देश भर में आंदोलन करे के नेकपा एमाले के एलान

काठमाडौं । नेकपा एमाले अपने पार्टी अध्यक्ष केपी शर्मा ओली के गिरफ्तारी के विरोध में सरकार के खिलाफ देशभर में जोरदार आंदोलन खड़ा करे के फैसला कइले बा।
मंगर के च्यासल में पार्टी मुख्यालय पर भइल केन्द्रीय सचिवालय के आपात बैठक में तय भइल कि वडा आ पालिका स्तर से लेके प्रदेश आ केन्द्र तक विरोध कार्यक्रम चलावल जाई। बैठक के बाद मीडिया से बात करत महासचिव शंकर पोखरेल कहनी कि सरकार के ई कदम राजनीतिक बदला लेवे वाला बा, आ पार्टी एकर कड़ा जवाब दी।
पार्टी के तय कार्यक्रम मुताबिक, आवे वाला चैत 24 के देश भर के जिला कमिटी बड़ा कार्यकर्ता सभा करी, जवन आंदोलन के आगि के हवा देई। एकर बाद, बैसाख 12 के राजधानी काठमांडू में विशाल विरोध प्रदर्शन आ जनसभा के तैयारी बा।
महासचिव पोखरेल कहनी कि ई प्रदर्शन सरकार के मनमानी के खिलाफ जनता के एकजुट आवाज होई, आ काठमांडू के सड़क से सरकार के सख्त चेतावनी दिहल जाई। अध्यक्ष ओली के गिरफ्तारी के बाद पार्टी भितर भारी नाराजगी देखाई दे रहल बा। पार्टी अपना कार्यकर्ता लोग के गांव-गांव से उठे आ स्थानीय स्तर से विरोध तेज करे के आह्वान कइले बा।
एह राजनीतिक हालत आ आंदोलन के एलान से देश के राजनीति अब और टकराव वाला दिशा में बढ़े के संकेत मिल रहल बा। बैसाख 12 के प्रदर्शन के एमाले अपना शक्ति प्रदर्शन के रूप में देखत बा, जवन आगे के राजनीतिक रास्ता बदल सकेला।
एह बीच, एमाले ई मुद्दा संसद में भी उठाई। पार्टी तय कइले बा कि प्रतिनिधि सभा में केपी शर्मा ओली के गिरफ्तारी के विरोध में जोरदार आवाज उठावल जाई।