बारा के जीतपुरसिमरा उपमहानगरपालिका वडा नं. ७ के भीतर पड़त सार्वजनिक आ गोचर जमीन पर बनल अवैध संरचना हटावे खातिर संबंधित पक्ष सभे के सूचना जारी कइले बा।
उपमहानगरपालिका के कार्यपालिका कार्यालय से जारी सूचना में बतावल गइल बा कि जीतपुर में पथलैया–वीरगंज ६ लेन सड़क के पूर्व–पश्चिम इलाका में पड़त पुरान जीतपुर भवानीपुर गाविस वडा नं. ३ के अलग–अलग कित्ता में अतिक्रमण क के बनावल संरचना हटावे के निर्देश देहल गइल बा।
सूचना अनुसार, आवे वाला २०८३ साल बैशाख २ गते तक सभे अवैध संरचना खुद से हटा लेवे के आग्रह कइल गइल बा। अगर तय समय तक ना हटावल गइल, त बैशाख ३ गते सबेरे ७ बजे से उपमहानगरपालिका खुद कार्रवाई करत सब संरचना हटा दी।
एह दौरान लागे वाला सगरी खर्च स्थानीय सरकार संचालन ऐन, २०७४ के दफा ४५ (४) अनुसार संबंधित व्यक्ति से वसूल कइल जाई। प्रशासनिक अधिकृत रामेश्वर बनजारा के हस्ताक्षर से जारी एह सूचना में साफ कहल गइल बा कि सार्वजनिक जमीन के संरक्षण आ सही व्यवस्था बनावे खातिर ई कदम उठावल गइल बा।
जीतपुर में अतिक्रमित दुकान आ संरचना हटावे खातिर उपमहानगर के कड़ा निर्देश
