एह साल के मानसून से दू लाख से अधिक लोग प्रभावित हो सकेला, एह बात के अनुमान लगावल गइल

एह साल के मानसून जनित विपद से देशभर में करीब 2 लाख 26 हजार से अधिक लोग प्रभावित हो सकेला, अइसन अनुमान लगावल गइल बा। विपद जोखिम न्यूनीकरण आ व्यवस्थापन कार्यकारी समिति के सार्वजनिक आकलन के अनुसार करीब 51 हजार 868 घर-परिवार के 2 लाख 26 हजार 661 लोग प्रभावित हो सकेला।
जल आ मौसम विज्ञान विभाग पहिले ही अनुमान लगा चुकल बा कि एह साल मानसून अवधि में औसत से कम बारिश आ औसत से ज्यादा गर्मी होई। विशेषज्ञन के अनुसार, ज्यादा तापमान के कारण ऊँच हिमाली इलाका में हिमताल फट जाए के खतरा बढ़ सकेला, जवन से नीचे के इलाका में बाढ़, पहिरा (भूस्खलन), जलभराव, जमीन कटान आ अचानक बाढ़ जइसन विपद आवे के संभावना बा।
एह बीच, विपद जोखिम न्यूनीकरण आ व्यवस्थापन कार्यकारी समिति के बियफे के बैठक में “मानसून पूर्वतैयारी आ प्रतिकार राष्ट्रीय कार्य योजना” के मंजूरी दे दिहल गइल बा। एह योजना से मानसून जनित जोखिम कम करे, बचाव आ राहत काम के अधिक प्रभावी बनावे के उम्मीद बा।
बैठक में खोज आ बचाव टीम के गठन आ संचालन से जुड़ल मापदंड 2083 (संशोधित) के भी स्वीकृति मिल गइल बा। राष्ट्रीय विपद जोखिम न्यूनीकरण आ व्यवस्थापन प्राधिकरण के अनुसार, एह व्यवस्था से विपद होतही सरकारी संयंत्र अपने आप सक्रिय हो सकेला, एह खातिर कानूनी आधार तैयार हो गइल बा।
विपद के समय अभ्यास के प्रभावी आ एकरूप बनावे खातिर “कृत्रिम घटना अभ्यास संचालन कार्यविधि, 2083” भी मंजूर कइल गइल बा।
एह के अलावा, निजी आवास पुनर्निर्माण आ पुनर्स्थापना अनुदान कार्यविधि, 2081 में जरूरी संशोधन कइल गइल बा। साथे, भूकंप बाद पुनर्निर्माण आ पुनर्स्थापना के काम तेज करे खातिर जिला आयोजना कार्यान्वयन इकाई में 21 गो तकनीकी कर्मचारी तैनात करे के फैसला भी कइल गइल बा।