कालिकामाई गाँवपालिकामे दफ्तर के अंदरिये कर्मचारी पर कुटाई, दोसियन पर कारवाई के माँग करत कर्मचारी लोग के पेन डाउन आंदोलन शुरू

वीरगंज। पर्सा के कालिकामाई गाँवपालिकामे काम करत एक कर्मचारी पर दफ्तर के अंदरिये कुटाई भइल घटना के विरोध में गाँवपालिका के सभे कर्मचारी लोग पेन डाउन आंदोलन शुरू कर देले बा। दोसियन पर कड़ा कानूनी कारवाई के माँग करत कर्मचारी लोग कामकाज पूरी तरह ठप्प कर देले बा।
मंगर के दुपहर करीब 12:51 बजे गाँवपालिका के कंप्यूटर ऑपरेटर चंदन कुमार चौरसिया पर गाँव कार्यपालिका दफ्तर परिसर के अंदरिये कुटाई आ दुर्व्यवहार भइल के आरोप लागल बा। घटना के बाद कर्मचारी लोग प्रमुख जिला अधिकारी भोला दाहाल के ज्ञापनपत्र देके दोसियन पर तुरन्त कानूनी कारवाई करे के माँग कइले बा।
कर्मचारी लोग के कहनाम बा कि दफ्तर समय में आपन जिम्मेदारी निभावत कर्मचारी पर योजनाबद्ध तरीका से हमला भइल बा, जवन पूरा कर्मचारी समुदाय पर हमला जइसन बा। एह तरह के घटना से कर्मचारी के मनोबल गिरेला आ प्रशासनिक कामकाज आ सुशासन पर खराब असर पड़ेला।
संयुक्त प्रेस विज्ञप्ति में कहल गइल बा कि घटना के पृष्ठभूमि स्वास्थ्य शाखा से चलत बहु-क्षेत्रीय पोषण कार्यक्रम से जुड़ल बा। एह मामला में कंप्यूटर ऑपरेटर चौरसिया के कवनो निजी संलग्नता ना होखे के बावजूद उनकरा पर हमला भइल, जे बहुत दुर्भाग्यपूर्ण आ निंदनीय बा।
कर्मचारी लोग कालिकामाई गाँवपालिका–2 के राजनिश कुशवाहा, वडा नं. 3 के वडाध्यक्ष संजय कुमार पटेल सहित दोसरा आरोपित लोग पर संघीय कानून अनुसार कड़ा कारवाई करे के माँग कइले बा। साथे सरकारी दफ्तर में काम करत कर्मचारी लोग के सुरक्षा सुनिश्चित करे खातिर संबंधित निकाय से अपील कइले बा।
माँग पूरा ना भइला तक गाँवपालिका के सभे कर्मचारी कामकाज के बहिष्कार करत जिला प्रशासन कार्यालय में धरना देवे आ पेन डाउन आंदोलन जारी रखे के चेतावनी देले बा।
कर्मचारी आंदोलन के कारण बुधबार गाँवपालिका के सभे प्रशासनिक सेवा प्रभावित भइल बा, आ गाँवपालिका अंतर्गत चलत सभे स्कूल भी बंद हो गइल बा।
एह बीच, इलाका प्रहरी कार्यालय पोखरिया बतवले बा कि घटना में संलग्न रहे के आरोप में कालिकामाई गाँवपालिका–2 निवासी रामबालक साह कानू आ अरविन्द चौरसिया के नियंत्रण में ले लिहल गइल बा। दोसरा संलग्न लोग के खोज जारी बा आ घटना के बारे में आगे जांच चल रहल बा।