राउन्ड टेबल नेपाल वीरगंज आ रोट्रयाक्ट क्लब ऑफ वीरगंज मेट्रोपोलिस के संयुक्त आयोजन में शनिचर के दिन वीरगंज में एगो बड़ रक्तदान कार्यक्रम सफलतापूर्वक पूरा भइल। एह कार्यक्रम में ५८ लोग रक्तदान कइले।
घंटाघर लगे स्व. तिवारी बाबा के सालिक परिसर में भइल कार्यक्रम में देवनाथ राय, सगुनकुमार सिंह, अफरोज अन्सारी, कृष्णमोहन यादव, संजोग थापा, शक्ति श्रेष्ठ, सहिम राउत गद्दी, राहुल महतो समेत कई लोग रक्तदान कइले।
ई कार्यक्रम राउन्ड टेबल नेपाल वीरगंज के अध्यक्ष सुमित मित्तल आ रोट्रयाक्ट क्लब ऑफ वीरगंज मेट्रोपोलिस के अध्यक्ष रामविनय यादव के संयुक्त अध्यक्षता में आयोजित भइल।
कार्यक्रम में नेपाल रेडक्रस सोसाइटी पर्सा के सभापति बृजकिशोर पटेल, दिनानाथ रौनियार, रोटरी क्लब ऑफ वीरगंज मेट्रोपोलिस के अध्यक्ष राजकिशोर प्रसाद, मोहित राजपाल, समाजसेवी राजेन्द्र भट्टराई समेत कई गणमान्य लोग के सहभागिता रहल।
कार्यक्रम में सुमित मित्तल कहले कि संस्था मानव जीवन बचावे के उद्देश्य से लगातार सामाजिक काम करत आ रहल बा। वीरगंज में खून के कमी के जानकारी मिलला पर ई रक्तदान कार्यक्रम आयोजित कइल गइल।
ऊ कहले कि रक्तदान से दाता के खास नुकसान ना होला, लेकिन जेकरा खून मिलेला, ओकर जान बच सकेला। ऊ स्वस्थ लोग से हर तीन महीना पर रक्तदान करे के अपील कइले।
नेपाल इनोभेटिव सोसाइटी वीरगंज के अध्यक्ष कमल चौगाई कहले कि हाल के दिन में रक्तसञ्चार केन्द्र में खून के कमी से नारायणी अस्पताल समेत कई अस्पताल में मरीज लोग के दिक्कत हो रहल बा।
ऊ एह मानवीय काम खातिर राउन्ड टेबल नेपाल वीरगंज आ रोट्रयाक्ट क्लब के धन्यवाद दिहलन आ कहले कि रक्तदान करे वाला लोग समाज के असली नायक हवे।
कार्यक्रम में रक्तसञ्चार केन्द्र वीरगंज के प्रमुख सौरवराज पाण्डे के नेतृत्व में स्वयंसेवक टीम रक्तदान प्रक्रिया में सहयोग कइले।