सल्यान में सांसद पन्त अनोखा अंदाज में कइलें ‘हम आवत बानी’ अभियान के समापन

वीरगंज। राष्ट्रीय स्वतंत्र पार्टी (रास्वपा) 20 असोज से 27 असोज तक चलवले गइल ‘हम आवत बानी’ अभियान के दौरान सल्यान पहुँचल सांसद बुद्धि पन्त (हरि) 27 असोज के एह अभियान के अनोखा अंदाज में समापन कइले।
रास्वपा के ‘हम आवत बानी’ अभियान के तहत सल्यान के कालिमाटी, त्रिवेणी, कपुरकोट आ छत्रेश्वरी समेत कई गो पालिका में पार्टी के स्थानीय नेता, कार्यकर्ता आ शुभचिन्तक लोग से भेंट कइल गइल। एह दौरान स्थानीय लोग शिकायत कइल कि सल्यान जिला से रास्वपा के प्रतिनिधित्व करे वाला सांसद ना होखला के चलते जिला में होखे वाला सामान्य समस्या के समाधान तक ना हो पावत बा। स्थानीय निकाय में भ्रष्टाचार आ अनियमितता बढ़े, अवैध क्रसर संचालन आ एह मामिला में पुलिस आ प्रशासन के भूमिका संतोषजनक ना होखे के शिकायत भी उठल।
स्थानीय लोग के शिकायत सुनला के बाद सांसद पन्त प्रमुख जिला अधिकारी से संबंधित निकाय के जिला प्रमुख लोग के साथे बैठक करे के आग्रह कइलें।
एकरा बाद जिला प्रशासन कार्यालय, सल्यान के बैठक कक्ष में प्रमुख जिला अधिकारी बन्दना कुमारी केसी के अध्यक्षता में बैठक भइल। बैठक में उठल समस्या आ सवाल के जवाब संबंधित कार्यालय के प्रमुख लोग दिहलें। ऊ लोग जिला स्तर पर समाधान हो सके वाला समस्या के तत्काल समाधान करे आ जिला स्तर पर समाधान ना हो सके वाला विषय के संबंधित मंत्रालय में सिफारिश करे के प्रतिबद्धता भी जतवलें।
बैठक में प्रमुख जिला अधिकारी बन्दना कुमारी केसी, शारदा नगरपालिका के प्रमुख प्रशासकीय अधिकृत हरिश चन्द्र बुढ़ा, सल्यान के प्रहरी प्रमुख प्रहरी नायब उपरीक्षक दीपक पातली, विद्युत प्राधिकरण के प्रमुख नरेश दत्त रावल आ भौतिक पूर्वाधार विकास कार्यालय के निमित्त प्रमुख सिद्धार्थ मिश्र समेत जिला के विभिन्न कार्यालय के प्रमुख लोग के उपस्थिति रहल।
अभियान के दौरान सांसद पन्त स्थानीय चुनाव के लक्ष्य से रास्वपा द्वारा देशभर में चलावल जा रहल ‘हम आवत बानी’ अभियान के तहत स्थानीय नेता, कार्यकर्ता आ शुभेच्छुक लोग के प्रशिक्षण भी दिहलें। एह प्रशिक्षण में कैंडिडेट क्लब से जुड़ल प्रक्रिया से लेके उम्मीदवार के चयन के अलग-अलग चरण के बारे में जानकारी दिहल गइल। साथही स्थानीय लोग के विभिन्न जिज्ञासा के जवाब भी दिहल गइल।
सांसद पन्त कहलें कि स्थानीय चुनाव में पार्टी के विधि-विधान से बाहर जाके केहू के टिकट ना मिली। एहसे सभे लोग निश्चिन्त होके संगठन निर्माण में लागे आ पार्टी तथा सरकार के ओर से कइल गइल अच्छा काम के जानकारी लेके जनता के बीच जाए।
अभियान में सल्यान जिला सभापति प्रकाश नेपाली, नेता राम बहादुर केसी, खड्ग बुढ़ा, लाल बहादुर बिक समेत पार्टी के अन्य नेता आ कार्यकर्ता लोग के सहभागिता रहल।