वीरगञ्ज । पर्सा के वीरगञ्ज स्थित ज्ञानदा एकेडेमी कक्षा ११ आ १२ के विज्ञान, व्यवस्थापन आ कानून संकाय के टर्मिनल परीक्षा में शानदार नतीजा हासिल करे वाला विद्यार्थी सभ के सम्मानित कइले बा ।
विद्यार्थी सभ के मेहनत, लगन आ शैक्षणिक उपलब्धि के कदर करत एकेडेमी बियफे के दिने एगो विशेष कार्यक्रम के आयोजन करके उत्कृष्ट विद्यार्थी सभ के नगद पुरस्कार आ ट्रफी देके सम्मानित कइले बा।
एकेडेमी परिसर में आयोजित नतीजा सम्मान आ पुरस्कार वितरण कार्यक्रम में अलग-अलग संकाय में पहिला, दूसरा आ तीसरा स्थान हासिल करे वाला विद्यार्थी सभ के क्रमशः ७ हजार, ५ हजार आ ३ हजार रुपिया नगद पुरस्कार के साथे ट्रफी प्रदान कइल गइल। विद्यार्थी सभ के पढ़ाई के प्रति अउरी प्रेरित करे, प्रतिस्पर्धा के भावना विकसित करे आ शिक्षा के क्षेत्र में उत्कृष्टता के संस्कार स्थापित करे के उद्देश्य से ई कार्यक्रम आयोजित कइल गइल, एकेडेमी जनवले बा।
कार्यक्रम के अध्यक्षता ज्ञानदा एकेडेमी के मुख्य कार्यकारी अधिकारी आ प्रिन्सिपल राजेन्द्र प्रसाद कोइराला कइले रहनी। स्वागत मन्तव्य व्यक्त करत ऊ कहलन कि विद्यार्थी सभ के शैक्षणिक सफलता में लगातार मेहनत, अनुशासन, सकारात्मक सोच आ लगन के बहुत महत्वपूर्ण भूमिका होला। विद्यार्थी सभ के सफलता खातिर विद्यालय के शैक्षणिक वातावरण के साथे-साथे अभिभावक के साथ, सहयोग आ उचित मार्गदर्शन भी ओतने जरूरी बा।
कार्यक्रम के प्रमुख अतिथि जीएचपी स्कूल के प्रिन्सिपल जगप्रीत सिंह आ विशिष्ट अतिथि नेशनल मेडिकल कॉलेज के प्रबन्ध निर्देशक शहनवाज अन्सारी रहनी। उहाँ लोग के उपस्थिति से कार्यक्रम अउरी गरिमामय बनल।
कार्यक्रम में उत्कृष्ट विद्यार्थी सभ के साथे-साथे ओह लोग के सफलता में महत्वपूर्ण योगदान देवे वाला अभिभावक सभ के भी विशेष सम्मान कइल गइल। अपना लइका-लइकी के शैक्षणिक यात्रा में लगातार प्रोत्साहन, सहयोग, त्याग आ मार्गदर्शन देके बेहतर नतीजा हासिल करे में मदद कइला के कदर करत अभिभावक सभ के प्रशंसापत्र प्रदान कइल गइल।
एकेडेमी के कहना बा कि विद्यार्थी के सफलता खाली कवनो एक पक्ष के प्रयास से संभव नइखे। ई विद्यार्थी के मेहनत, शिक्षक के समर्पण, अभिभावक के सहयोग आ शैक्षणिक संस्था के जिम्मेदार भूमिका के संयुक्त परिणाम ह।
कार्यक्रम में अभिभावक, शिक्षक, सञ्चारकर्मी आ शिक्षा क्षेत्र से जुड़ल विभिन्न व्यक्तित्व सभ के उल्लेखनीय उपस्थिति रहल। एह मौका पर विद्यार्थी सभ के शैक्षणिक उपलब्धि के प्रशंसा करत आगे अउरी ऊँच लक्ष्य तय करके पढ़ाई जारी रखे खातिर प्रेरित कइल गइल।
ज्ञानदा एकेडेमी के विश्वास बा कि अइसन सम्मान कार्यक्रम से विद्यार्थी सभ में आत्मविश्वास बढ़े ला आ स्वस्थ प्रतिस्पर्धा के भावना विकसित होला ।
एकेडेमी विद्यार्थी, अभिभावक आ विद्यालय के बीच के संबंध अउरी मजबूत बनावत गुणवत्तापूर्ण शिक्षा के माध्यम से बौद्धिक रूप से सक्षम, नैतिक मूल्य से भरल आ सामाजिक रूप से जिम्मेदार नागरिक तैयार करे के अपना अभियान के लगातार आगे बढ़ावे के बात कहलस।
कार्यक्रम के अंत में एकेडेमी उत्कृष्ट नतीजा हासिल करे वाला सभ विद्यार्थी, उनका अभिभावक आ मेहनती शिक्षक सभ के बधाई देत आगे के शैक्षणिक यात्रा के सफलता खातिर शुभकामना व्यक्त कइलस।