सगरमाथा एकेडेमी में दीपावली आ छठ के अवसर पर भव्य दीया बनावे आ रंगोली प्रतियोगिता सम्पन्न

वीरगञ्ज । सगरमाथा एकेडेमी स्कूल के प्रांगण में दीपावली आ छठ महापर्व के पावन अवसर पर विद्यार्थी लोग के प्रतिभा, रचनात्मकता, कला आ सांस्कृतिक पहचान के उजागर करे के उद्देश्य से भव्य दीया बनावे आ रंगोली प्रतियोगिता सम्पन्न भइल।
विद्यालय के प्रधानाध्यापक जियालाल गुप्ता के अध्यक्षता में आ सुरजीदेवी स्कूल के पूर्व प्रधानाध्यापक लालबाबु तिवारी के प्रमुख आतिथ्य में कार्यक्रम सम्पन्न भइल। कार्यक्रम में विशिष्ट अतिथि आ निर्णायक (जज) के रूप में कलाकार आ चित्रकार मुकेश महतो समेत कई गो गणमान्य लोग के उपस्थिति रहल।
कार्यक्रम के दू गो अलग-अलग विधा में बाँटल गइल रहे। कक्षा 1 से 4 तक के छोट-छोट विद्यार्थी भाई-बहिन खातिर आकर्षक आ रचनात्मक दीया बनावे के प्रतियोगिता आयोजित कइल गइल रहे। ओहीजा कक्षा 5 से 10 तक के विद्यार्थी लोग खातिर अलग-अलग रंग के संयोजन से आकर्षक रंगोली बनाके आपन कला, कल्पना आ प्रतिभा देखावे के अवसर दिहल गइल।
प्रतियोगिता में विद्यार्थी लोग बहुत उत्साह आ मेहनत के साथ आपन रचनात्मक क्षमता के प्रदर्शन कइल। खास करके छोट विद्यार्थी लोग के बनावल आकर्षक दीया आ बड़का कक्षा के विद्यार्थी लोग के तैयार कइल मनमोहक रंगोली से विद्यालय के माहौल दीपावलीमय हो गइल।
एहसे अलावा विद्यार्थी लोग छठ पर्व के मौलिक संस्कृति के झलक देखावत झिझिया नृत्य आ दोसरा मनोरंजक सांस्कृतिक नृत्य के प्रस्तुति देके कार्यक्रम के अउरी आकर्षक आ उल्लासमय बना दिहल।
प्रतियोगिता में हिस्सा लेवे वाला विद्यार्थी लोग में से सबसे बढ़िया प्रदर्शन करे वाला प्रथम, द्वितीय आ तृतीय स्थान हासिल करे वाला विद्यार्थी लोग के प्रमुख अतिथि, सभापति आ विशिष्ट अतिथि लोग के हाथ से शिल्ड, मेडल आ प्रमाणपत्र देके सम्मानित कइल गइल।
कार्यक्रम के संचालन विद्यालय के संजीव यादव कइले। एह मौका पर शिक्षिका रिंकु कर्ण, मुना पटेल, अशीम चौधरी, सुनीता साह, शिक्षक शिवकुमार समेत अन्य शिक्षक-शिक्षिका लोग के सक्रिय सहभागिता आ सहयोग रहल।
कार्यक्रम के सम्बोधन करत प्रमुख अतिथि लालबाबु तिवारी कहलें कि विद्यार्थी लोग के सर्वांगीण विकास खातिर अइसन अतिरिक्त गतिविधि बहुत जरूरी बा। विद्यार्थी लोग के भीतर छिपल प्रतिभा के पहिचान करके ओकरा के उचित अवसर उपलब्ध करावल विद्यालय के महत्वपूर्ण जिम्मेदारी ह।
ओहीजा विद्यालय के प्रधानाध्यापक जियालाल गुप्ता विद्यार्थी लोग के प्रेरणादायी संदेश देत कहलें, “शिक्षा खाली किताब के पन्ना तक सीमित नइखे। शिक्षा के मतलब जीवन के हर क्षेत्र में आपन प्रतिभा, रचनात्मकता, अनुशासन आ आत्मविश्वास के प्रदर्शन करे के क्षमता विकसित कइल ह। छोट-छोट हाथ से बनावल एगो दीया होखे चाहे बड़का विद्यार्थी लोग के तैयार कइल एगो रंगोली, हर रचना के भीतर एगो नया सोच आ संभावना छिपल रहेला।”
उहाँ आगे कहलें, “जिंदगी में हमेशा पहिला स्थान हासिल करे के जरूरी नइखे, बाकिर हर काम में आपन सबसे बढ़िया प्रयास करे के चाहीं। पुरस्कार जीते के बात बड़ बा, बाकिर प्रतियोगिता में भाग लेवल, नया बात सीखल आ आपन प्रतिभा के प्रदर्शन कइल ओकरा से भी बड़ उपलब्धि ह। आज के छोट प्रयास ही काल्ह के बड़ सफलता के आधार बन सकेला।”
एह कार्यक्रम से विद्यार्थी लोग में रचनात्मक सोच, आत्मविश्वास, आपसी सहयोग, सांस्कृतिक चेतना आ प्रतिस्पर्धा के भावना विकसित करे में महत्वपूर्ण योगदान मिलल।