वीरगंज । पर्सा जिला पुलिस कार्यालय बतवले बा कि आर्थिक वर्ष २०८२/८३ के फागुन महीना में कुल ८४ गो मामला दर्ज भइल आ पाँच करोड़ ४९ लाख रुपइया से अधिक राजस्व बरामद कइल गइल।
प्रवक्ता डीएसपी राजु कार्की के अनुसार सामाजिक अपराध से जुड़ल २१ मामला, संगठित आ आर्थिक अपराध के १९, जान (हत्या/हिंसा) संबंधी १३ आ चोरी संबंधी १० मामला दर्ज भइल बा। चलत मामला में ५१ आरोपी गिरफ्तार कइल गइल बाड़ें। अदालत से दोषी ठहरावल गइल आ फरार रहल ४७ लोग के पकड़ के १२ साल ३ महीना के कैद आ ३,४८,४५५ रुपइया जुर्माना भरावल गइल।
लागू औषध (ड्रग्स) संबंधी ५ मामला में ५ आदमी गिरफ्तार भइल बाड़ें। पुलिस ३४२ किलो गाँजा आ ५२,३०० ट्रामाडोल क्याप्सूल भी बरामद कइले बा।
राजस्व संकलन में भी सफलता मिलल बा। अवैध भंसार (कस्टम) चोरी से ३,७९,६७५ रुपइया के सामान बरामद कइल गइल। राजस्व चुहावट रोके के दौरान ५,४९,२९,६१९ रुपइया के सामान बरामद भइल। एहसे अलावा ५७ क्युबिक फिट साल के लकड़ी आ २ गो साइकिल जब्त कइल गइल, जवना से २,८५,००० रुपइया राजस्व उठावल गइल।
फागुन महीना में ट्राफिक व्यवस्था के तहत ७३ गो सड़क दुर्घटना भइल, जवन में ३ आदमी के मौत हो गइल आ २८ आदमी घायल भइल बाड़ें। ट्राफिक नियम तोड़े पर १२,१९,५०० रुपइया जुर्माना वसूल कइल गइल। पुलिस के अनुसार ज्यादातर दुर्घटना के कारण चालक के लापरवाही रहल।
जनानी, बच्चा आ सामाजिक सेवा के क्षेत्र में भी पुलिस सक्रिय रहल। एह महीना में ४० लापता व्यक्ति मिलल बाड़ें। घरेलू हिंसा के ४८ शिकायत में से ४५ मामला में समझौता करावल गइल। लागू औषध, बाल विवाह, साइबर अपराध जइसन विषय पर जागरूकता कार्यक्रम से १,७५१ नागरिक लाभान्वित भइल बाड़ें।
दूसर गतिविधि में पुलिस हॉटलाइन से ११,६९९ कॉल प्राप्त कइलस आ २,४१३ सेवाग्राही के सीधा सेवा दिहलस। चुनाव विरोधी गतिविधि में शामिल ७ आदमी के विस्फोटक पदार्थ सहित गिरफ्तार भी कइल गइल।
पर्सा पुलिस फागुन महीना में ८४ मामला दर्ज कइलस, पाँच करोड़ से ज्यादा राजस्व बरामद
