काठमांडू। मध्यपूर्व में ईरान, इजरायल आ अमेरिका के बीच बढ़त सैन्य तनाव के बावजूद फागुन महीना में लगभग 53 हजार नेपाली रोजगार खातिर विदेश गइल बाड़ें।
वैदेशिक रोजगार विभाग के ताजा आंकड़ा मुताबिक फागुन में कुल 52 हजार 944 लोग श्रम स्वीकृति लिहले बाड़ें। एह में 46 हजार 452 मर्दाना आ 6 हजार 392 जानानी शामिल बाड़ी। फागुन के दोसरा हफ्ता तक श्रम स्वीकृति के प्रक्रिया जारी रहल, एह वजह से विदेश जाए वाला लोग के संख्या उल्लेखनीय रहल। हालांकि पिछला महीना के तुलना में ई संख्या थोड़ा कम देखल गइल बा।
क्षेत्रीय सुरक्षा संकट के देखते सरकार हाल ही में इजरायल, खाड़ी देशन आ टर्की समेत 11 देश खातिर श्रम स्वीकृति अस्थायी रूप से रोक दिहले बा। फागुन 17 के मंत्रीस्तरीय फैसला के बाद सऊदी अरब, यूएई, कतर, कुवैत, बहराइन, ओमान, इराक, यमन, जॉर्डन, लेबनान, टर्की आ इजरायल खातिर नया श्रम स्वीकृति आ नवीकरण दुनो रोक दिहल गइल बा।
बतावल जा रहल बा कि ईरान द्वारा अमेरिकी सैन्य बेस पर मिसाइल आ ड्रोन हमला तेज कइला के बाद ओह इलाका में रहत नेपाली लोग के सुरक्षा के ध्यान में रखत ई कदम उठावल गइल बा।
फागुन महीना में नेपाली कामदार लोग के सबसे बड़ा गंतव्य मलेसिया रहल, जहाँ 12 हजार 601 लोग गइल। एहके बाद यूएई में 11 हजार 492, कतर में 6 हजार 775 आ सऊदी अरब में 6 हजार 225 लोग श्रम स्वीकृति लेकर विदेश गइलें।
माघ महीना में 70 हजार से जादे नेपाली विदेश गइल रहे, जबकि फागुन में ई संख्या घटके करीब 52 हजार पर आ गइल बा।
सरकार जब तक नया सूचना जारी ना करी, तब तक द्वंद्व प्रभावित इलाका में कामदार भेजे पर रोक जारी रही। एहसे अनुमान लगावल जा रहल बा कि आवे वाला महीनन में वैदेशिक रोजगार खातिर विदेश जाए वाला नेपाली के संख्या अउर घट सकेला।
खाड़ी में युद्ध के साया बीच फागुन में 53 हजार नेपाली विदेश गइलें
