वीरगंज में सशस्त्र पुलिस के टीम बड़ा मात्रा में अवैध दवाई बरामद कइले

सशस्त्र प्रहरी बल नेपाल, सीमा सुरक्षा गुल्म वीरगंज के टीम काठमांडू ले जात यात्री बस से करीब 6 लाख 26 हजार रुपइया के अवैध दवाई बरामद कइले बा।
गुजरल रात सशस्त्र प्रहरी निरीक्षक निरज थापा के नेतृत्व में चलत मोबाइल गस्ती टीम वीरगंज महानगरपालिका–16 बसपार्क इलाका में नियमित जांच करत रहे, ओही दौरान ई सामान मिलल।
जांच में बिना बिल-बिजक वाला सिल्डिनाफिल टैबलेट 2101 पत्ता, प्रेगआउट किट 267 पत्ता आ एरोसल स्प्रे 125 गो बरामद भइल। प्रारंभिक जानकारी अनुसार ई सभ दवाई यौनवर्धक आ गर्भ रोके वाला प्रकार के बा।
गुल्म के प्रमुख डीएसपी विकास अधिकारी बतवले कि, “बरामद दवाई के जरूरी जांच आ कानूनी प्रक्रिया खातिर वीरगंज भन्सार कार्यालय में जमा करा दिहल गइल बा।”
सशस्त्र प्रहरी हाल के समय में सीमावर्ती इलाका में अवैध तस्करी रोकए खातिर निगरानी अउरी सख्त कइले बा।