आजु चैती छठ के दुसरका दिन खरना मनावल जा रहल

वीरगंज — लोकआस्था के महापर्व चैती छठ के आज दूसरा दिन खरना विधि श्रद्धा आ भक्ति के साथ मनावल जा रहल बा। चार दिन चले वाला ई परब काल्हे नहाय-खाय विधि से शुरू भइल रहे।
आज व्रत रखे वाला लोग दिन भर निराहार रह के साँझ माटी के चुल्हा पर दूध, चाउर आ सख्खर से खीर (रसियाव) आ रोटी बनाके छठी मइया के पूजा करेला। पूजा खतम भइला के बाद परिवार संगे प्रसाद खाइल जाला आ ओकरा बाद 36 घंटा के कठोर व्रत शुरू हो जाला।
काल्हे नहाय-खाय में व्रतालु लोग शुद्ध भोजन ग्रहण करके व्रत के शुरुआत कइले रहलें। परब के मौका पर नदी, पोखरा आ छठ घाट सभ के सफाई आ सजावट तेज गति से चल रहल बा।
छठ परब के मुख्य दिन मंगर के साँझिया डूबत सूरज के अर्घ्य आ बुध के भोर में उगत सूरज के अर्घ्य देके परब के विधिवत समापन हो जाई।