काठमांडू । ‘जेनजी’ आंदोलन के दमन के आरोप में गिरफ्तार पूर्व प्रधानमंत्री केपी शर्मा ओली आ पूर्व गृहमंत्री रमेश लेखक के हिरासत से रिहा करे के मांग करत सर्वोच्च अदालत में दायर बंदी प्रत्यक्षीकरण रिट पर सोमर के सुनवाई होखे वाला बा।
एतवार के, ओली के पत्नी राधिका शाक्य आ लेखक के पत्नी यशोदा लेखक अलग-अलग रिट दायर कइली, जहवाँ ऊ लोग दावा कइली कि उनका पतियन के गैरकानूनी तरीका से हिरासत में राखल गइल बा।
सर्वोच्च अदालत के प्रवक्ता अर्जुनप्रसाद कोइराला के अनुसार, दुनो रिट दर्ज हो चुकल बा आ अदालत सोमर खातिर सुनवाई के तारीख तय कइले बा।
पिछला भादो में भइल ‘जेनजी’ आंदोलन के दमन के जांच खातिर बनावल आयोग के रिपोर्ट के आधार पर सरकार शनिचर के दुनो नेता के गिरफ्तार कइले रहल।
बाकिर, रिट में कहल गइल बा कि खाली आयोग के रिपोर्ट या सिफारिश के आधार पर, बिना ठोस कानूनी प्रक्रिया के, एतना जिम्मेदार पद पर रहल नेता लोग के गिरफ्तार कइल लोकतांत्रिक मूल्य आ कानून के शासन के खिलाफ बा।
अब सोमार के होखे वाला शुरुआती सुनवाई आ अदालत के आदेश पर राजनीतिक आ कानूनी दायरा में काफी नजर बनल बा।
केपी शर्मा ओली आ रमेश लेखक के गिरफ्तारी के खिलाफ सर्वोच्च अदालत में रिट: बिहान सोमार के सुनवाई होई
