अंतर्राष्ट्रीय कृष्णभावनामृत संघद्वारा जगन्नाथ रथ यात्रा होरहल

अंतर्राष्ट्रीय कृष्णभावनामृत संघ (इस्कॉन) वीरगंज अब तिसरका बेर श्री जगन्नाथ रथ यात्रा 2082 के आयोजन करे जा रहल बा। ई भव्य आध्यात्मिक कार्यक्रम एह साल चैत 28 गते, मतलब 11 अप्रैल 2026 के दिन, दुपहरिया 1 बजे से शुरू होई।
वैदिक परंपरा के अनुसार मनावल जाए वाला रथ यात्रा भगवान जगन्नाथ, बलदेव आ सुभद्रा के दिव्य यात्रा के प्रतीक ह। एह मौका पर भगवान लोग के रथ शहर भर घुमावल जाला, जेसे भक्त लोग के दर्शन आ आशीर्वाद मिले के मौका मिलेला। मानल जाला कि ई पर्व समाज में एकता, भक्ति आ सद्भाव के संदेश फैलावेला।
कार्यक्रम के तहत भव्य रथ यात्रा, भजन-कीर्तन, आध्यात्मिक प्रवचन आ हजारों श्रद्धालु खातिर मुफ्त प्रसाद वितरण कइल जाई।
रथ यात्रा गहवा माई पार्क से शुरू होके मकालु होटल, पूजन होटल, कैलाश होटल होते अर्वा पोखरी आ गौतम मंदिर रोड से गुजरत फेर माइस्थान पार्क पर खत्म होई।
आयोजक लोग के अनुसार, कार्यक्रम खातिर लगभग 5 लाख 50 हजार रुपिया खर्च के अनुमान बा। साथे हजारों श्रद्धालु के ध्यान में रखत प्रसाद, यातायात, ट्रैफिक आ सुरक्षा के खास इंतजाम कइल जा रहल बा।
एह रथ यात्रा में पर्सा, बारा, रौतहट जिला के साथे भारत के रक्सौल इलाका से भी करीब 4 हजार से 6 हजार लोग शामिल होखे के उम्मीद बा। कार्यक्रम के सुरक्षित आ व्यवस्थित बनावे खातिर नेपाल पुलिस आ सशस्त्र प्रहरी बल के तैनाती रही।
आयोजक सभे भक्तजन आ आम जनता से निवेदन कइले बा कि कार्यक्रम में शामिल होके पुण्य के लाभ उठाईं।