अब एनओसी आ लोकसेवा के प्रवेशपत्र मोबाइले में, लाइन में खड़ा रहे के झंझट खतम

सरकारी सेवा के टेक्नोलॉजी से जोड़ के सीधा जनता तक पहुँचावे के लक्ष्य से सरकार नागरिक ऐप में कई गो महत्वपूर्ण सुविधा जोड़ रहल बा।
सूचना प्रविधि विभाग अब आवे वाला एक हफ्ता के भीतर विदेश में पढ़ाई खातिर जरूरी ‘नो अब्जेक्सन सर्टिफिकेट’ (NOC), लोक सेवा आयोग के प्रवेश पत्र आ निजामती कर्मचारी के व्यक्तिगत विवरण (PIS) नागरिक ऐप से ही मिले के व्यवस्था करे के अंतिम चरण में बा। अभी ई सभ सुविधा टेक्निकल टेस्टिंग में बा, आ जइसे ही पूरा तरह लागू होई, सरकारी दफ्तर में घंटों लाइन में खड़ा रहे आ झंझट वाला कागजी प्रक्रिया से काफी राहत मिली।
विभाग के महानिर्देशक चन्द्र साह के मुताबिक, नया सिस्टम लागू होखे के बाद सेवा लेवे में आसानी आ तेजी आई। ई कदम सरकार के ‘शासकीय सुधार से जुड़ल सौ कार्यसूची’ के योजना के तहत उठावल गइल बा। संचार मंत्री डा. विक्रम तिमिल्सिना समय पर काम पूरा करे खातिर सख्त निर्देश देले बाड़न, जवना से विभाग दोसरा सरकारी निकाय के साथ मिल के तेजी से काम आगे बढ़ावत बा।
एह प्रक्रिया में नेपाल इंजीनियरिंग परिषद के साथ समझौता भी हो चुकल बा, जवन से अब जल्दी ही प्रोफेशनल इंजीनियर लोग के सर्टिफिकेट भी डिजिटल रूप में ऐप पर उपलब्ध होई।
सरकार के दीर्घकालीन योजना बा कि सगरी सरकारी सेवा एके प्लेटफॉर्म पर मिल सके, आ नागरिक ऐप के लगातार बेहतर बनावल जाव। एह से पहिले पुलिस क्लियरेंस रिपोर्ट ऑनलाइन देवे के काम सफल हो चुकल बा, जवना से अब नया सुविधा डिजिटल नेपाल के सपना के अउरी मजबूत करी।
खास करके विदेश पढ़े जाए वाला विद्यार्थी आ सरकारी नौकरी के तैयारी करे वाला युवा लोग खातिर ई सुविधा बहुत फायदेमंद साबित होई। एह से सेवा में पारदर्शिता बढ़ी आ काम जल्दी-फटाफट होखी। विभाग के अनुसार, कुछ दिन में औपचारिक उद्घाटन करके ई सेवा सब जनता खातिर खोल दीहल जाई।