वीरगंज के नगवा में नया साल के अवसर पर ‘श्री हनुमान आराधना आ महाआरती’ कार्यक्रम

वीरगंज। नया साल 2083 के अवसर पर वीरगंज महानगरपालिका–16 नगवा में विशेष धार्मिक कार्यक्रम ‘श्री हनुमान आराधना तथा महाआरती’ आयोजित होखे जा रहल बा।
श्री नगवा दुर्गा पूजा समिति के आयोजन में चलल श्री 108 सप्ताह हनुमान चालीसा पाठ के सफल समापन के उपलक्ष्य में ई भव्य कार्यक्रम करावे के तैयारी कइल गइल बा।
आयोजक समिति पत्रकार सम्मेलन करके जानकारी देले कि वैशाख 1 गते मंगर के दिन नगवा पोखरी स्थित प्रसिद्ध श्री बैधि माई मन्दिर परिसर में ई धार्मिक उत्सव मनावल जाई।
कार्यक्रम अनुसार बिहानिया से साँझिया 5 बजे तक लगातार हनुमान आराधना चलत रही। साँझिया 6:30 बजे विशेष ‘महाआरती’ के आयोजन होई। महाआरती के बाद उपस्थित भक्तजनन के बीच प्रसाद वितरण के व्यवस्था भी कइल गइल बा।
आयोजक समिति सब वीरगंजबासी, स्थानीय लोग आ भक्तजन से अपील कइले बा कि एह धार्मिक कार्यक्रम में शामिल होके पुण्य लाभ प्राप्त करस।
नया साल के शुरुआत धार्मिक चेतना आ आध्यात्मिक माहौल में करे के ई कार्यक्रम महत्वपूर्ण मानल जा रहल बा।