वीरगञ्ज (पर्सा) — हिन्दू पत्रकार समाज के बैनर तले आजु भइल पत्रकार सम्मेलन में दिहल जानकारी अनुसार, वीरगञ्ज के रेलवे रोड पर स्थित श्री पञ्चमुखी हनुमान मन्दिर के प्रांगण में वैशाख ९ गते से नौ दिन के राम महायज्ञ आ श्रीराम कथा कार्यक्रम भव्य रूप से शुरू होखे जा रहल बा।
ई आयोजन श्री राम कथा यज्ञ समिति आ वीरगञ्जवासी लोग के संयुक्त पहल से कइल जा रहल बा। कार्यक्रम के तहत २०८३ साल वैशाख ९ गते सबेरे ८:०० बजे कलश यात्रा निकाली जाई। हर दिन सबेरे ८:०० से ११:०० बजे तक वेदी पूजन आ तिजहरिया ३:०० से साँझ ७:०० बजे तक श्रीराम कथा वाचन के कार्यक्रम तय कइल गइल बा।कथा वाचन काशी से आइल पूज्य श्री मधुकर जी महाराज द्वारा कइल जाई। महायज्ञ के पहिलका दिने कलश यात्रा मे सबेरे ७ बजे नगर परिक्रमा भी होई, जेमे श्रद्धालु घडिहर्वा पोखरी से जल भर के नगर परिक्रमा करत यज्ञ स्थल तक पहुँचिहें।
आयोजकन के अनुसार, एह धार्मिक आयोजन पर करीब १४ से १५ लाख रुपिया के लागत अनुमानित बा। राम टोल, कुम्हाल टोल, नगवा आ जेल टोल समेत कई इलाका में घर-घर जा के चन्दा संकलन कइल गइल बा। साथे ही सामाजिक आ धार्मिक लोग से भी सहयोग जुटावल गइल बा।कार्यक्रम स्थल पर मूर्ति निर्माण, मेला आ झूला जइसन कई आकर्षण के व्यवस्था भी कइल गइल बा, जेसे श्रद्धालु लोग खातिर आयोजन अउरी आकर्षक बने के उम्मीद बा।यज्ञाचार्य स्वामी राजीव रञ्जन भारद्वाज सभे श्रद्धालु लोग से अपील कइले बाड़न कि कार्यक्रम में शामिल होके धर्म लाभ जरूर उठाई।