जिला पुलिस कार्यालय पर्सा चैत महीना के प्रगति रिपोर्ट सार्वजनिक करत बतवले बा कि अपराध नियंत्रण, राजस्व चुहावट रोकथाम आ फैसला कार्यान्वयन में उल्लेखनीय सफलता मिलल बा।
पुलिस के अनुसार एह अवधि में कुल १५२ गो मामला दर्ज भइल, जेमे से ५८ गो संगठित आ आर्थिक अपराध से जुड़ल बा। अलग-अलग घटना में शामिल १०२ गो आरोपी के गिरफ्तार कइल गइल बा।
फैसला कार्यान्वयन के तहत फरार रहल ६८ गो आरोपी के पकड़ के १३ साल ३ महीना २५ दिन के कैद भोगवावल गइल बा, साथे १ करोड़ २३ लाख २० हजार ७४८ रुपइया जरिवाना वसूल कइल गइल बा।
राजस्व चुहावट नियंत्रण अभियान के तहत ५ करोड़ ४० लाख ४२ हजार ४०५ रुपइया के अवैध सामान बरामद भइल बा। भन्सार छली के सामान में से १ लाख ६४ हजार ५३० रुपइया के सामग्री सहित एक जने के गिरफ्तार कइल गइल बा। एहिजा अवैध वन पैदावार में २५ क्यूबिक फिट साल के लकड़ी आ दू गो साइकिल बरामद भइल, जवन से १ लाख २५ हजार रुपइया राजस्व संकलन भइल बा।
लागूऔषध नियंत्रण के मामला में ७ गो केस दर्ज भइल आ १३ गो लोग गिरफ्तार भइल बा। एह दौरान १६४ किलो ९६ ग्राम गांजा, १.८५ ग्राम ब्राउन सुगर आ ५१ हजार ८०० गो विभिन्न प्रकार के नशिला दवाई बरामद कइल गइल बा। साथे ३ गो अवैध हथियार आ ३०० ग्राम बारूद भी मिलल बा।
सड़क दुर्घटना के हिसाब से चैत महीना में ७८ गो दुर्घटना भइल, जेमे २ जने के मौत भइल आ १२१ जने घायल भइलें। ट्राफिक कार्रवाई में ९०९ गो गाड़ी पर कार्रवाई कइल गइल आ ११ लाख ५६ हजार रुपइया जरिवाना वसूल भइल।
घरेलू हिंसा से जुड़ल ६७ गो शिकायत में से ६४ गो मामला आपसी सहमति से सुलझा दिहल गइल बा। साथे लागूऔषध, आत्महत्या रोकथाम आ ट्राफिक जागरूकता से जुड़ल १४२ गो कार्यक्रम चला के ३,३५५ लोग के लाभ पहुंचावल गइल बा।
जिला पुलिस कार्यालय पर्सा के प्रवक्ता प्रहरी नायब उपरीक्षक हरि बहादुर बस्नेत के अनुसार, प्रविधि के उपयोग पर जोर देत सीसीटीभी निगरानी, सोशल मीडिया मॉनिटरिंग आ नियमित गश्ती के माध्यम से जिला के शांति सुरक्षा अउरी मजबूत बनावल गइल बा।
पर्सा पुलिस के चैत महीना के प्रगति सार्वजनिक: १५२ मामला दर्ज, १०२ लोग गिरफ्तार, करोड़ों के राजस्व वसूली
