वीरगंज । मुख्य सड़क के चौड़ा करे के अभियान तेज होखे के साथे अब वीरगंज के लोगन के तीन दिन तक बिजली कटौती के सामना करे के पड़ सकेला। सड़क विस्तार के दौरान बिजली के खंभा आ तार हटाके दोसरा जगह ले जाए के काम चलत बा, एह चलते नेपाल विद्युत प्राधिकरण, वीरगंज वितरण केंद्र कहलस कि अगिला तीन दिन बिजली सेवा प्रभावित रही।
प्राधिकरण के अनुसार २०८३ साल के बैशाख ६ से ८ तारीख तक अलग-अलग इलाका में बिजली सप्लाई अनियमित रह सकेला। त्रिभुवन राजपथ के मितेरी पुल से लेके गंडक नहर चोक तक २५-२५ मीटर सड़क विस्तार हो रहल बा, एह चलते पोल आ तार के स्थानांतरण के काम भोरहीं से शुरू कइल जाई।
एह दौरान वीरगंज सबस्टेशन के तहत वीरगंज–१, २, ५, ६, राधेमाई, जगन्नाथपुर आ प्रसौनी इलाका प्रभावित होई। ओही तरह छपकैया सबस्टेशन के हस्पिटल, बिर्तामाई, छपकैया आ बलिरामपुर फीडर से जुड़ल सभ इलाका में भी बिजली सेवा बाधित रही।
वितरण केंद्र के प्रमुख ई. विजय महतो के कहना बा कि सड़क विभाग डोजर से संरचना हटावत बा, जेसे कभी-कभी बिजली लाइन में अचानक मरम्मत के जरूरत पड़ सकेला। ऊ कहलन कि अगर काम तय समय से पहिले पूरा हो गइल, त बिजली सेवा जल्दी बहाल क दिहल जाई।
प्राधिकरण सेवाग्राही लोग से होखे वाला असुविधा खातिर माफी मांगत मदद करे के अपील कइले बा।
सड़क विस्तार के चलते वीरगंज में तीन दिन तक बिजली बाधा
