वीरगञ्ज । वीरगञ्ज के मुख्य सड़क, जे कि त्रिभुवन राजपथ के नाम से जानल जाला, ओकरा मापदंड के हिसाब से सड़क के केंद्र बिंदु तय करे के काम मंगल से आधिकारिक रूप से शुरू होखे जा रहल बा।
सोमार के वीरगञ्ज महानगरपालिका में मेयर राजेशमान सिंह के अध्यक्षता में भइल संबंधित पक्षन के संयुक्त बैठक में ई फैसला लिहल गइल कि सड़क विस्तार के व्यवस्थित ढंग से आगे बढ़ावे खातिर आधिकारिक नक्शा के आधार पर केंद्र बिंदु चिन्हित करके स्टील के कील गाड़ल जाई। एह बैठक में जिला प्रशासन कार्यालय, सड़क डिभिजन कार्यालय हेटौंडा आ नापी कार्यालय पर्सा के प्रतिनिधि लोग शामिल रहलें।
अभी सड़क विस्तार के दौरान कुछ संरचना हटावल गइल बा, बाकिर असली केंद्र भाग साफ ना होखे से स्थानीय लोग में भ्रम के स्थिति बनल रहल। खासकर, कौन सीमा तक संरचना हटे, एह बात पर साफ जानकारी ना होखे से लगातार शिकायत आवत रहल।
अब जब केंद्र बिंदु तय हो जाई, त सड़क के दाहिना-बायां बराबर दूरी राख के सही चौड़ाई सुनिश्चित करे में आसानी होई। एहसे उम्मीद बा कि सड़क विस्तार के काम अउरी पारदर्शी, व्यवस्थित आ बिना विवाद के होई।
नाप-जोख खातिर जरूरी तकनीकी आ भौतिक सामग्री सड़क डिभिजन कार्यालय हेटौंडा उपलब्ध कराई, जबकि नक्शा आ मापन से जुड़ल काम नापी कार्यालय पर्सा करी।
सड़क डिभिजन कार्यालय हेटौंडा के इंजीनियर भोला प्रसाद साह के मुताबिक, मंगल के सबेरे से ही नाप-जोख के काम शुरू हो जाई। एह खातिर सड़क डिभिजन, नापी कार्यालय, जिला प्रशासन आ वीरगञ्ज महानगरपालिका के संयुक्त टीम बनावल गइल बा, जे नाप-जोख से लेके काम के लागू करे तक समन्वय करी।
एहसे पहिले सड़क विस्तार अभियान के तहत इतवार के गण्डक से लेके भन्सार तक घर आ टहरा पर डोजर चलावल गइल रहल।
वीरगञ्ज के मुख्य सड़क के केंद्र बिंदु तय करे के काम विहान से शुरू
