वीरगञ्ज में सड़क विस्तार के विवाद : बिना मुआवजा के संरचना हटावे ना देवे के स्थानीय लोग के विरोध

वीरगञ्ज महानगरपालिका क्षेत्र में पड़े पुरान बजार क्षेत्र में सड़क विस्तार के फैसला से स्थानीय बासिन्दा, व्यापारी आ सरोकारवाला बीच विवाद पैदा हो गइल बा।
भौतिक पूर्वाधार तथा यातायात मन्त्रालय के निर्देशन अनुसार वीरगञ्ज–पथलैया सड़क खण्ड के बजार क्षेत्र में सड़क विस्तार क के “इन्टरसेक्सन सुधार” आ “इन्टिग्रेटेड चेकपोस्ट (ICP)” तक जाए वाला गाड़ी के आवाजाही सहज बनावे के योजना आगे बढ़ावल गइल रहे। लेकिन अचानक सड़क के दायाँ–बायाँ मौजूद संरचना हटावे आ “बिल्ट अप एरिया” तय करे के निर्णय पर मुख्य सड़क के घर मालिक लोग आपत्ति जनावत बा।
स्थानीय लोग कहत बा कि उनकरा अतिक्रमणकारी बतावल जा रहल बा, जेकरा से गलत धारणा बनावल जा रहल बा। उ लोग जोर देत बा कि उनकर जमीन के लालपुर्जा बा, एहसे बिना मुआवजा दिहले सड़क चौड़ा ना कइल जाए।
सरकार के तरफ से निर्णय लागू करे के प्रयास में स्थानीय लोग विरोध जतावत बाड़े। उनकर कहनाम बा कि सड़क विस्तार के नाम पर सैकड़ों साल पुरान बस्ती, व्यापारिक प्रतिष्ठान, मठ–मंदिर, स्कूल आ अन्य संरचना हटावे से बहुत आर्थिक आ सामाजिक नुकसान होई।
स्थानीय लोग के अनुसार एह क्षेत्र से लगभग १५०० घरधुरी आ १ लाख से अधिक जनसंख्या प्रभावित हो सकेला। ई इलाका व्यापारिक रूप से बहुत महत्वपूर्ण बा, एहसे व्यवसाय पर सीधा असर पड़ी।
मन्त्रालय कहत बा कि सार्वजनिक हित खातिर सड़क चौड़ा करे के जरूरत बा। अधिकारी लोग के अनुसार बढ़त ट्राफिक समस्या के समाधान आ अन्तर्राष्ट्रिय नाका (ICP) तक पहुंच सहज बनावे खातिर ई फैसला जरूरी बा।
लेकिन स्थानीय लोग आरोप लगावत बा कि बिना वैकल्पिक योजना के एकतरफा निर्णय लेहल गइल बा। उ लोग वैकल्पिक सड़क, पुरान संरचना के संरक्षण, उचित मुआवजा आ पुनर्स्थापना के मांग करत बा।
स्थानीय सरोकार समिति सरकार से बार–बार निर्णय पुनर्विचार करे के आग्रह कइले बा। उनकर कहनाम बा कि ऐतिहासिक, सांस्कृतिक आ आर्थिक रूप से महत्वपूर्ण क्षेत्र के बिना विचार हटावल विकास ना होके विनाश ह।
उ लोग अब कानूनी रास्ता अपनावे के चेतावनी देत बाड़े आ कहत बाड़े कि न्याय खातिर प्रधानमंत्री कार्यालय आ सर्वोच्च अदालत तक जाए के तैयारी बा।
बीरगंज उद्योग वाणिज्य संघ के अध्यक्ष हरि गौतम के अध्यक्षता में आयोजित राय–सुझाव संकलन कार्यक्रम में पूर्व नगर प्रमुख विजय कुमार सरावगी, पूर्व अध्यक्ष ओम प्रकाश सिकरिया, गोपाल केडिया, अधिवक्ता देवेन्द्रलाल नेपाली, नेपाली कांग्रेस नेता अजय द्विवेदी, सुरेन्द्र चौधरी लगायत लोग अपना–अपना विचार रखलें। कार्यक्रम के संचालन मनोज उपाध्याय कइले रहलें।