एसईई के रिजल्ट आखिरी चरण में, वैशाख 29 तक आई जा सकेला नतीजा

काठमांडू । माध्यमिक शिक्षा परीक्षा (एसईई) देके रिजल्ट के बेसब्री से इंतजार करत लाखों विद्यार्थी सभ के अब इंतजार खतम होखे जा रहल बा।
राष्ट्रीय परीक्षा बोर्ड वैशाख 29 के भीतर रिजल्ट जारी करे खातिर आखिरी तैयारी तेज कर देले बा। परीक्षा नियन्त्रक टुकराज अधिकारी के अनुसार, विद्यार्थी सभ के नंबर सिस्टम में डालल (इन्ट्री) के काम पूरा हो चुकल बा आ बुध से विवरण के जांच (रुजु) तेजी से होत बा। कवनो तकनीकी गलती न होखे, एह खातिर बोर्ड पूरा सावधानी से डाटा जांच रहल बा आ तय समय में रिजल्ट निकालल लक्ष्य बा।
एह साल के एसईई परीक्षा पिछला साल से अलग आ जल्दी करे खातिर नया रणनीति अपनावल गइल रहल। चैत 19 से 29 तक चलल परीक्षा में कॉपी जांच खातिर केन्द्रे पर व्यवस्था कइल गइल रहल, जवन से परीक्षा खतम होते ही रिजल्ट तैयारी के काम तेजी से आगे बढ़ गइल। कॉपी जांच के बाद अंक एकजुट करे के काम भी पूरा हो चुकल बा, एह से अब कुछ दिन में रिजल्ट जारी होखे के पूरा संभावना बा।
आंकड़ा के मुताबिक, एह साल देशभर से 5 लाख 12 हजार 421 विद्यार्थी आवेदन देले रहलें। एह में 4 लाख 41 हजार 566 नियमित आ 70 हजार 855 ग्रेड वृद्धि खातिर परीक्षा में शामिल भइलें।
एह बेर छात्रा के संख्या छात्र से ज्यादा रहल—2 लाख 57 हजार 613 छात्रा आ 2 लाख 54 हजार 801 छात्र परीक्षा में शामिल भइलें। रिजल्ट के तारीख नजदीक आवत देख विद्यार्थी आ अभिभावक सभ में उत्साह आ उत्सुकता दूनो बढ़त जा रहल बा।