कलैया (बारा)। जिल्ला प्रहरी कार्यालय बाराले अदालत से दोषी ठहर भइके लंबे समय से फरार चलत १६ गो प्रतिवादी के एक साथ गिरफ्तार कइले बा।
प्रहरी के अनुसार बारा जिल्ला अदालत से विभिन्न मुद्दा में सजाय सुनावल के बाद भी कानून से बचके लुक-छिप के रहे वाला लोग के विशेष प्रहरी टोली द्वारा जिल्लाका अलग-अलग जगह से नियन्त्रण में लेल गइल।
पकड़ल गइल लोग में सामान्य मारपीट से लेके गंभीर किसिम के फौजदारी मुद्दा तक के दोषी सामिल बाड़ें। प्रहरी बतवले बा कि चेक बाउन्स, भैंस चोरी, सवारी ज्यान, खोटा चलन, कुटपिट आ सरकारी छाप दस्तखत जाली जइसन मुद्दा में अदालत द्वारा दोषी ठहर कइल व्यक्ति लोग के गिरफ्तारी भइल बा।
जिल्ला में सुरक्षा व्यवस्था मजबूत बनावे आ “अपराध कइला के बाद कोनो बचाव ना होला” ई संदेश देवे खातिर प्रहरी फैसला कार्यान्वयन अभियान के तहत ई कारवाही कइले बा।
जिल्ला प्रहरी कार्यालय बाराका अनुसार गिरफ्तार १६ गो प्रतिवादी के कैद भुक्तान आ जरिवाना असुली के प्रक्रिया पूरा क के बारा जिल्ला अदालत में बुझावल गइल बा।
बारा मे १६ गो फरार प्रतिवादी के गिरफ्तार कइल गइल
