वीरगंज। बाराके जीतपुरसिमरा उपमहानगरपालिका–२३ भलुही स्थित एभरेष्ट छाला उद्योग में ट्रान्सफार्मर फटला से घाइल भइल एगो मजदूर के इलाज के दौरान मौत हो गइल।
एह घटना में गम्भीर रूप से घाइल पर्सा के बहुदरमाई नगरपालिका–३ निवासी ४५ बरिस के चरनजित यादव के मंगल के इलाज के दौरान मौत हो गइल, पुलिस जानकारी दिहले बा।
यादव के मौत के बाद पीड़ित परिवार आ स्थानीय लोग मुआवजा आ दोषियन पर कार्रवाई के मांग करत प्रदर्शन कइलें। प्रदर्शन के चलते पथलैया–वीरगंज सड़क कुछ देर खातिर जाम हो गइल रहे।
बतावल जा रहल बा कि गत वैशाख २२ गते एभरेष्ट छाला उद्योग में ट्रान्सफार्मर लगावे के दौरान विस्फोट भइल रहे। स्थानीय लोग उद्योग आ ट्रान्सफार्मर मरम्मत में लागल कंपनी पर लापरवाही के आरोप लगावत दूनो पक्ष पर कार्रवाई के मांग कइलें।
पीड़ित परिवार के किटानी जाहेरी के आधार पर पुलिस जांच शुरू कइले बा। इलाका प्रहरी कार्यालय सिमरा के प्रहरी नायब उपरीक्षक दिलीप क्षेत्री के अनुसार, जांच खातिर अनमोल गुरुङ आ सोनु यादव के हिरासत में लेल गइल बा, जबकि बाकी संलिप्त लोग के खोज जारी बा।
ट्रान्सफार्मर फटला से घाइल मजदूर के मौत, मुआवजा के मांग पर स्थानीय लोग सड़क जाम कइले
