मलेसिया के समुन्दर में आप्रवासी लोग के ले जात डुङ्गा पलट गइल, १४ जने लापता, २३ के बचावल गइल

काठमांडू। मलेसिया के पश्चिमी तट पर स्थित पांकोर द्वीप के नजदीक 37 गो कागज बिना आप्रवासी लोगन के ले जा रहल एगो नाव हादसा के शिकार हो गइल। सोमवारी भइल एह हादसा में 14 लोग लापता बा, जबकि 23 लोग के सुरक्षित बचा लिहल गइल बा, स्थानीय अधिकारी लोग जानकारी दिहलस।
पेराक स्थित मलेशियन मेरिटाइम इन्फोर्समेंट एजेंसी (एमएमईए) के अनुसार, एगो स्थानीय मछुआरा समुंदर में लोगन के तैरत देखके सुरक्षा एजेंसी के खबर दिहलस। खबर मिलते ही बचाव दल मौके पर पहुंच के डूबत 23 लोग के निकाल के प्राथमिक इलाज खातिर भेजलस।
पेराक एमएमईए के निदेशक मोहम्मद शुक्री खोटोब के जारी बयान अनुसार, ई नाव 9 मई के इंडोनेशिया के किसरन से रवाना भइल रहल। शुरुआती जांच से पता चलल बा कि ई आप्रवासी लोग मलेसिया के पेनांग, तेरेंगानु, सेलांगोर आ क्वालालंपुर जइसन जगह पर काम खातिर गैरकानूनी तरीका से घुसल चाहत रहलें।
लापता 14 लोग के खोज खातिर मलेसियाई सरकार बड़ा स्तर पर रेस्क्यू ऑपरेशन चला रहल बा। खोज अभियान में खास नाव, हेलीकॉप्टर आ विमान के इस्तेमाल कइल जा रहल बा। बचावल गइल लोगन के आगे के कानूनी जांच खातिर स्थानीय पुलिस के जिम्मा दे दिहल गइल बा।
एशिया के आप्रवासी लोग खातिर मलेसिया एगो प्रमुख गंतव्य देश मानल जाला। खासकर निर्माण आ कृषि क्षेत्र में सस्ता मजदूरी खातिर इंडोनेशिया, म्यांमार आ दक्षिण एशियाई देशन से लोग जोखिम भरा समुद्री रास्ता से मलेसिया जाए के कोशिश करेला।
एहसे पहिले, नवंबर 2025 में थाइलैंड–मलेसिया सीमा के नजदीक अइसने एगो हादसा में 36 लोग के जान गइल रहल। मानव तस्कर लोग अक्सर छोट आ असुरक्षित नाव में जरूरत से ज्यादा लोगन के बैठा के ले जाला, जेसे अइसन दुखद घटना बार-बार होत रहेला।