प्रतिनिधि सभा के बैठक आज फेरु बैठत बा

काठमांडू। प्रतिनिधि सभा के बैठक आज फेरु बइठत बा। बुध के तीन बेर बइठ के स्थगित भइल बैठक आजु सबेरे ११ बजे खातिर बोलावल गइल बा।
बैठक में सरकार के नीति आ कार्यक्रम प चर्चा होखे के कार्यसूची बा, आ ओकरा बाद प्रधानमंत्री बालेन्द्र शाह नीति आ कार्यक्रम पर सांसद लोग के उठावल सवालन के जवाब दीहन, एह बात के संसद सचिवालय संभावित कार्यसूची में जनवले बा।
प्रधानमंत्री बालेन्द्र शाह संसद प्रति जिम्मेदार ना बने के चलते प्रतिनिधि सभा के बैठक प्रभावित भइल बा। नीति आ कार्यक्रम पर सांसद लोग सवाल उठवले रहे, बाकिर जवाब देवे वाला दिनो प्रधानमंत्री संसद में मौजूद ना रहलन, जेकरे चलते विपक्षी दल नाराबाजी कइलन।
बतावल जा रहल बा कि जब राष्ट्रपति रामचन्द्र पौडेल सरकार के नीति आ कार्यक्रम पढ़त रहलन, ओही दौरान प्रधानमंत्री बैठक छोड़ के चल गइले, जेकर जोरदार आलोचना हो रहल बा।
एह हालत में बुध के पारित होखे वाला नीति आ कार्यक्रमो प्रभावित भइल। संसद के योजना रहल कि बाकी बचल चर्चा पूरा क के बुधे फैसला लेल जाई, बाकिर एहमें बाधा आ गइल।
बैठक में खाली शून्य समय (Zero Hour) ही कार्यसूची मुताबिक चल पवल। सभामुख डीपी अर्याल जब अर्थमंत्री स्वर्णिम वाग्ले के नीति आ कार्यक्रम पर चर्चा शुरू करे के प्रस्ताव रखे खातिर समय दिहलन, त विपक्षी सांसद उठ के नाराबाजी करे लागलन।
प्रधानमंत्री के अनुपस्थिति के मुद्दा विपक्षी दल खातिर मुख्य एजेन्डा बन गइल आ बैठक के अवरोध कइल गइल। विपक्षी दल प्रधानमंत्री के इस्तीफा के माँग भी कइलन।
मुख्य विपक्षी नेपाली कांग्रेस पहिले ही आकस्मिक समय लेके, चाहे रूलिंग कराके, प्रधानमंत्री के संसद में उपस्थित करावे के माँग कइले रहुवे।