वीरगञ्ज । मधेस प्रदेश के प्रतिष्ठित शैक्षिक संस्था हरि खेतान बहुमुखी क्याम्पस में शिक्षक आ प्रशासन बीच के विवाद उग्र रूप ले लेले बा। क्याम्पस प्रमुख किशोरी राय यादव पर कालोमसो लगाके विरोध कइल गइल, जेकरा के लेके बड़ बवाल मचल बा।
कर्मचारी आ शिक्षक लोग के कहना बा कि क्याम्पस में प्रशासनिक सुधार, समय पर तलब भुगतान आ अन्य सेवा सुविधा के मांग लमहर समय से उठावल जा रहल रहे, बाकिर समाधान ना निकले के कारण असन्तोष बढ़त गइल। एहि दबाव के बीच क्याम्पस परिसर में अचानक विरोध प्रदर्शन भइल आ क्याम्पस प्रमुख पर दुर्व्यवहार के घटना हो गइल।
घटना के वीडियो सोशल मीडिया पर तेजी से फैल रहल बा। क्याम्पस के एगो कर्मचारी कहले कि “समस्या के समाधान बातचीत से करे के बजाय ए तरह के तरीका निन्दनीय बा।”
घटना के बाद जिल्ला प्रहरी कार्यालय पर्सा के टोली क्याम्पस पहुंचल आ स्थिति के जानकारी लेले। पुलिस बतवले बा कि शामिल लोग के पहिचान कइल जा रहल बा आ कानूनी कारबाई आगे बढ़ावल जाई।
क्याम्पस प्रमुख यादव कहले बाड़न कि ई घटना खाली व्यक्तिगत हमला ना होके पूरा शैक्षिक संस्थान के प्रतिष्ठा पर असर डाले वाला बा।
शिक्षक समुदाय में ए घटना के लेके चर्चा तेज हो गइल बा। शिक्षाविद लोग कहत बा कि मांग राखे के अधिकार सबके बा, बाकिर विरोध के तरीका मर्यादित होखे के चाहीं। घटना के बाद क्याम्पस के पठनपाठन आ प्रशासनिक कामकाज पर भी असर पड़ल बा।
हरि खेतान क्याम्पस के प्रमुख यादव पर कालोमसो (स्याही) फेंक के हमला कइल
