वीरगंज । गर्मी के मौसम सुरू होतिए बजार में अंडा के उत्पादन में भारी गिरावट आ गइल बा, जवन से एकर दाम तेज़ी से बढ़ गइल बा। उत्पादकन के छाता संगठन नेपाल लेयर्स कुखुरापालक संघ बजार के मांग आ कम आपूर्ति के देखते अंडा के नया समर्थन मूल्य तय कइले बा। एह हिसाब से बड़ा अंडा पर प्रति क्रेट (३० गो) ३० रुपइया आ मझिला अंडा पर ५० रुपइया दाम बढ़ावल गइल बा।
संघ के नया दर अनुसार अब बड़ा अंडा के फार्म मूल्य ५१५ रुपइया प्रति क्रेट हो गइल बा, जवन पहिले ४८५ रुपइया रहल। ओही तरह मझिला अंडा के दाम ४३५ से बढ़के ४८५ रुपइया हो गइल बा। संघ के सचिव मदन पोखरेल के कहनाम बा कि एह बढ़ोतरी के चलते अब बजार में उपभोक्ता के एक गो अंडा खातिर लगभग २५ रुपइया देवे के पड़ी।
संघ के अध्यक्ष विनोद पोखरेल बतवलें कि दाम बढ़े के कई कारण बा। अभी हफ्ता में दू दिन सार्वजनिक छुट्टी होखे से पर्यटन बढ़ गइल बा, होटल आ रेस्टुरेंट में अंडा के खपत बहुत बढ़ गइल बा। बाकिर मांग बढ़े के हिसाब से उत्पादन ना बढ़ पावत बा। ऊ कहलें, “गर्मी बढ़े से कुखुरा कम अंडा देला। ऊपर से अलग-अलग संक्रामक बीमारी के चलते बहुत कुखुरा मर गइल, जेसे उत्पादन पर भारी असर पड़ल बा।”
दाम बढ़ला से उपभोक्ता पर भार बढ़ रहल बा, बाकिर किसान लोग अबहियों ठीक से नफा ना कमा पावत बा। संघ के अनुसार एक गो अंडा तैयार करे में किसान के करीब १९ रुपइया १२ पैसा लागत लागेला (दाना, दवाई, मजदूरी समेत)। बीच में बिचौलिया लोग के दखल आ बजार के अस्थिरता के चलते किसान आपन लागत तक ना निकाल पावत बाड़ें, जवन से कई लोग ई पेशा छोड़ रहल बा। मजदूर के कमी आ घाटा के चलते कई फार्म बंद होखे के कगार पर बा।
संघ के मानना बा कि देशभर के फार्म से रोज के दाम के वैज्ञानिक तरीका से मिलाके ई राष्ट्रीय समर्थन मूल्य तय कइल गइल बा, जवन बजार के कुछ हद तक स्थिर बनावे में मदद करी।
गरमी से उत्पादन घटल, अंडा के दाम आसमान छू लिहल
