बारा के परवानीपुर गाँवपालिके आर्थिक वर्ष 2083/084 खातिर 36 करोड़ 63 लाख 10 हजार रुपइया के बजट सहित नीति आ कार्यक्रम सार्वजनिक कइले बा। सोमबार के भइल 18वाँ गाँवसभा में विकास निर्माण, सेवा प्रवाह आ आर्थिक समृद्धि के केंद्र में रखत आवे वाला साल के नीति, कार्यक्रम आ बजट पारित कइल गइल।
गाँवसभा में पेश बजट में से करीब 60 प्रतिशत रकम चालू खर्च आ 40 प्रतिशत पुँजीगत खर्च खातिर छुटावल गइल बा। उपाध्यक्ष के आदेश पर प्रमुख प्रशासकीय अधिकृत मुन्ना साह रौनियार नीति आ कार्यक्रम पेश कइलन, जवना में शिक्षा, पूर्वाधार विकास, भूमि प्रशासन, सरसफाई, आर्थिक विकास आ प्रभावी सेवा प्रवाह के मुख्य प्राथमिकता देहल गइल बा।
नीति आ कार्यक्रम अनुसार गाँवपालिके भीतर बनत स्कूल भवन सभ के पूरा कइल जाई। साथे करदाता सेवा अब गाँवपालिके से ही उपलब्ध करावल जाई, भूमि प्रशासन से जुड़ल सेवा स्थानीय स्तर पर दीहल जाई आ वडा नं. 1 में नदी नियंत्रण के काम पूरा करे के लक्ष्य राखल गइल बा।
एहिसे अलावा, लिपनीमाल स्थित गुर्दी बाजार इलाका में सड़क के उत्तर-दक्षिण हिस्सा में भवन निर्माण पूरा कइल जाई, वडा नं. 5 बहुअरी में मुख्य सड़क आ नाला निर्माण कइल जाई, आ नया स्कूल भवन आ बाल विकास केंद्र बनावे के कामो प्राथमिकता में राखल गइल बा।
गाँवसभा नियमित सफाई आ कचरा प्रबंधन कार्यक्रम चलावे के नीति भी मंजूर कइले बा। नवाचार आधारित आर्थिक विकास कार्यक्रम से स्थानीय उत्पादन के बढ़ावा, रोजगार के सृजन आ आर्थिक गतिविधि के विस्तार करे के लक्ष्य तय कइल गइल बा।
गाँवसभा अधिवेशन के संबोधित करत गाँवपालिका अध्यक्ष रामक्षत्री प्रसाद कुर्मी कहलन कि नीति आ कार्यक्रम के सफल लागू करे खातिर जनप्रतिनिधि, कर्मचारी, राजनीतिक दल, नागरिक समाज आ स्थानीय लोगन के बीच सहकार्य बहुत जरूरी बा। ऊ कहलन कि सुशासन आ नागरिक के आसान आ गुणस्तरीय सेवा देवे के ध्यान में रखके ई बजट आ कार्यक्रम बनावल गइल बा।
अधिवेशन में उपाध्यक्ष सुगान्धी देवी कनुइन, प्रमुख प्रशासकीय अधिकृत मुन्ना साह रौनियार, समाजसेवी नेता उमेश साह कानु, जनप्रतिनिधि, कर्मचारी, राजनीतिक दल के प्रतिनिधि आ स्थानीय सरोकार वाला लोग के सहभागिता रहल।
परवानीपुर के नीति आ कार्यक्रम सार्वजनिक भइल, गाँवसभा के माध्यम से पालिका 36 करोड़ 63 लाख के योजना सार्वजनिक
