भारत में रोजगार खातिर गइल सर्लाही के एक नेपाली युवक के ऑटो दुर्घटना में मौत हो गइल बा, जबकि बाकी सवार लोग घायल हो गइल बा।
सर्लाही के धनकौल गाउँपालिका–4 के रहइया लगन राम उर्फ ढुनमुन राम के 32 साल के बेटा अजय राम के भारत के बिहार राज्य के ढाका इलाका में शुक्रवार भोर करीब 5 बजे भइल ऑटो दुर्घटना में मौत हो गइल।
बतावल जा रहल बा कि ऊ सभ लोग पंजाब से किसानी काम क के घर लवटत रहलें, एह दौरान ऊ लोग सवार ऑटो दुर्घटना के शिकार हो गइल। दुर्घटना में अजय राम के मौत हो गइल, पुलिस ई बात के पुष्टि कइले बा।
एह हादसा में उमेश राम, नर्सिंग राम, प्रमोद राम, चुनचुन राम, दिलीप राम आ नवीन माझी समेत कई लोग घाइल हो गइल बा। सभे घाइल लोग के भारत के सरकारी अस्पताल में इलाज चल रहल बा।
मृतक अजय राम के शव पोस्टमार्टम खातिर सरकारी अस्पताल ढाका भेजल गइल बा आ शव के नेपाल लियावे के प्रक्रिया आगे बढ़ावल जा रहल बा।
नेपाली कांग्रेस के नेता आ समाजसेवी दिपेश राय यादव घटना पर दुख जतावत कहलें कि पीड़ित परिवार के तुरंत उचित मुआवजा मिलल चाहीं आ घटना के निष्पक्ष जांच होके न्याय मिलल जरूरी बा।
यादव ई भी मांग कइलें कि घाइल लोग के इलाज खातिर जरूरी मदद मिलो आ शव के नेपाल लियावे के प्रक्रिया आसान बनावल जाव। एही खातिर ऊ नेपाल सरकार आ संबंधित निकाय के ध्यान आकर्षित कइलें।
भारत में काम करे गइल नेपाली लोग घर लवटत बेरा भइल एह दुर्घटना से धनकौल गाउँपालिका–4 में शोक के माहौल बन गइल बा। स्थानीय लोग भी पीड़ित परिवार के राहत आ मुआवजा देवे के मांग करत बा।