पर्सा के पकाहा मैनपुर गाँवपालिका में पड़ेला श्री संसारीमाई माध्यमिक विद्यालय, सुर्जाहा–२ के तत्कालीन प्रधानाध्यापक पप्पु प्रसाद चौहान के विद्यालय के बरबुझारथ करे खातिर गाँवपालिके से आखिरी चेतावनी देहल गइल बा।
गाँवपालिके चौहान के चौथी बेर ताकेता पत्र भेजत तीन दिन के भीतर स्कूल के नगद, जिन्सी आ जरूरी कागजात वर्तमान प्रधानाध्यापक मनोज कुमार यादव के सौंप के बरबुझारथ पूरा करे के निर्देश देले बा। तय समय में ई काम ना कइला पर कानून मुताबिक कड़ा कार्रवाई होखे के चेतावनी देहल गइल बा।
एही बीच, बरबुझारथ प्रक्रिया पूरा ना होखे तक श्री संसारीमाई माध्यमिक विद्यालय के बैंक खाता रोक देवे के फैसला भी गाँवपालिके कइले बा।
गाँवपालिके अनुसार, काज सरुवा के फैसला भइला के बाद वर्तमान प्रधानाध्यापक मनोज कुमार यादव कई बेर बरबुझारथ खातिर आग्रह कइले बाड़ें, लेकिन तत्कालीन प्रधानाध्यापक चौहान नगद, जिन्सी आ जरूरी कागजात सौंपे में लगातार आनाकानी करत आइल बाड़ें।
एहसे पहिले भी गाँवपालिके श्री रा.च.भ. माध्यमिक विद्यालय आ संसारीमाई माध्यमिक विद्यालय से जुड़ल जिम्मेदारी आ कागजात बरबुझारथ करे खातिर ताकेता कइले रहे। बाकिर बार-बार निर्देश के पालन ना भइला पर अब गाँवपालिके सख्ती बढ़वले बा।
प्रमुख प्रशासकीय अधिकृत देवनाथ साह के हस्ताक्षर वाला ताकेता पत्र में चौहान से बरबुझारथ ना करे के कारण बतावे आ तुरंत वर्तमान प्रधानाध्यापक यादव संगे प्रक्रिया पूरा करके गाँवपालिका कार्यालय के जानकारी देवे के निर्देश दिहल गइल बा।
गाँवपालिके कहनाम बा कि बार-बार ताकेता के बावजूद अटेर कइला से स्कूल में प्रशासनिक आ आर्थिक पारदर्शिता बनावे खातिर बैंक खाता रोकल गइल बा।
अगर तीन दिन के भीतर बरबुझारथ पूरा ना भइल, त निजामती आ स्थानीय सेवा कानून के अनुसार विभागीय आ कानूनी कार्रवाई शुरू कइल जाई, ई बात गाँवपालिके साफ क देले बा।
पर्सा में पूर्व प्रधानाध्यापक के ३ दिन भीतर बरबुझारथ करे के निर्देश, स्कूल के बैंक खाता रोकल गइल
