काठमाडौं । रसुवा के भोटेकोशी नदी में पिछला भादो१० गते आइल विनाशकारी बाढ़ से प्रभावित इलाका के उद्धार, राहत आ पुनर्स्थापना खातिर सरकार अउरी ६ करोड़ ७५ लाख रुपइया उपलब्ध करावे वाला बा।
राष्ट्रीय विपद् जोखिम न्यूनीकरण तथा व्यवस्थापन प्राधिकरण के पछिला बैठक में पहिले से दिहल ६ करोड़ ७५ लाख रुपइया में अउरी ६ करोड़ ७५ लाख रुपइया जोड़ के देवे के फैसला भइल बा। एह फैसला के बाद प्रभावित इलाका खातिर छुटावल गइल कुल राहत रकम १३ करोड़ ५० लाख रुपइया पहुँच गइल बा।
प्राधिकरण के फैसला अनुसार बाढ़ से सभसे बेसी प्रभावित रसुवा के चार स्थानीय तह के कुल ४ करोड़ ५० लाख रुपइया दिहल जाई। एह में गोसाइँकुण्ड गाउँपालिका के २ करोड़, उत्तरगया गाउँपालिका के १ करोड़ ५० लाख, कालिका गाउँपालिका के ६० लाख आ आमाछोदिङमो गाउँपालिका के ४० लाख रुपइया मिलल बा।
ओही तरह, बाढ़ से भारी प्रभावित नुवाकोट के चार स्थानीय तह खातिर कुल ६ करोड़ रुपइया विनियोजन कइल गइल बा। एह में विदुर नगरपालिका के ३ करोड़, बेलकोटगढी नगरपालिका के १ करोड़ ५० लाख, तारकेश्वर गाउँपालिका के १ करोड़ आ किस्पाङ गाउँपालिका के ५० लाख रुपइया छुटावल गइल बा।
एकरा अलावा धादिङ के चार स्थानीय तह के १ करोड़ ८० लाख रुपइया दिहल जाई। एह में गल्छी गाउँपालिका के ६० लाख आ सिद्धलेक, गजुरी तथा बेनिघाट रोराङ गाउँपालिका के ४०–४० लाख रुपइया प्रदान कइल जाई।
ओही तरह, गोरखा के गण्डकी गाउँपालिका आ तनहुँ के देवघाट तथा आँबुखैरेनी गाउँपालिका के राहत आ विपद् व्यवस्थापन खातिर जनही ४०–४० लाख रुपइया उपलब्ध करावल जाई।
प्राधिकरण के अनुसार भोटेकोशी के बाढ़ से प्रभावित एह सभ जिला में अबहियो खोज, उद्धार आ पुनर्स्थापना के काम तेजी से जारी बा।