सातोमाई मन्दिर में नवरात्रि के तइयारी तेज, कलश स्थापना खातिर गाँव के बैठक

वीरगञ्ज । वीरगञ्ज महानगरपालिका–२३ प्रसौनी बिर्ता में स्थित सातोमाई मन्दिर में नवरात्रि के अवसर पर होखे वाला कलश स्थापना आ पूजा कार्यक्रम के तइयारी तेज कर दिहल गइल बा। कार्यक्रम के भव्य आ व्यवस्थित ढंग से सम्पन्न करे के उद्देश्य से स्थानीय लोगन के सहभागिता में गाँव के बैठक सम्पन्न भइल।
नवरात्रि पूजा समिति के अध्यक्ष लालबाबु यादव के अध्यक्षता में भइल बैठक में पूजा, कलश स्थापना, मन्दिर परिसर के सरसफाई आ व्यवस्थापन लगायत के विषय पर चर्चा कइल गइल। बैठक में संविधानसभा सदस्य बिचारी यादव, वडा अध्यक्ष अवधकिशोर कुशवाहा, वडा सदस्य कान्तिदेवी, समिति के उपाध्यक्ष लोकनारायण यादव, कोषाध्यक्ष राकेशकुमार साह, पूर्वअध्यक्ष जगारनाथ दास लगायत स्थानीय अगुवा लोग के सहभागिता रहल।
बैठक में हर कलश स्थापना करे वाला भक्तजन के पण्डित के ७ सय ५१ रुपइया, हजाम के १ सय ५० रुपइया आ मालोरिन के १ सय रुपइया देवे के निर्णय कइल गइल, समिति के ओर से जनावल गइल।
स्थानीय लोगन के सामूहिक सहभागिता आ सहयोग से सातोमाई मन्दिर में हर साल नवरात्रि पर्व श्रद्धा, भक्ति आ उत्साह के साथ मनावल जात बा। 🙏🚩