अभिनय के दिग्गज नाना पाटेकर के निधन

काठमांडू । बॉलीवुड के चर्चित आ वरिष्ठ अभिनेता नाना पाटेकर के निधन हो गइल बा। ७५ बरिस के उमिर में बियफे के सबेरे गोवा स्थित अपना निवास पर दिल के दौरा पड़ला के बाद उनकर निधन होखे के भारतीय सञ्चार माध्यम सभ जनवले बाड़ें।
गोवा के डोना पाउला स्थित निवास पर तबीयत खराब भइला के बाद उनकरा के तुरते अस्पताल ले जाइल गइल। मणिपाल अस्पताल के चिकित्सक डा. शेखर सालकर के मुताबिक अस्पताल पहुँचला तक उनकर हालत बहुत गंभीर हो गइल रहे। डॉक्टर लोग करीब ४५ मिनट तक सीपीआर समेत जान बचावे के कोशिश कइल, बाकिर उनकरा के बचावल ना जा सकल। सबेरे करीब ५ बजके २० मिनट पर उनकर मौत होखे के बतावल गइल बा।
चिकित्सक लोग के अनुसार नाना पाटेकर रात करीब २ बजके ३० मिनट पर असहज महसूस होखे के बात अपना एगो दोस्त के संदेश भेजले रहले। बाकिर रात के समय होखला के चलते उ संदेश तुरते देखल ना जा सकल। बाद में ऊ अपना निवास पर बेहोशी के हालत में मिललें, जवना के बाद अस्पताल ले जाइल गइल।
उनकर निधन के बाद मेडिको–लिगल केस (एमएलसी) दर्ज कइल गइल बा। मौत के सही कारण के पुष्टि खातिर पोस्टमार्टम करे के बात कहल गइल बा।
नाना पाटेकर भारतीय सिनेमा के एगो बहुआयामी कलाकार के रूप में जानल जात रहलें। हिन्दी आ मराठी सिनेमा में पाँच दशक से अधिक समय तक सक्रिय रहल नाना पाटेकर गंभीर से लेके हास्य भूमिका तक अपना अभिनय के अलग पहचान बनवले रहलें। ‘परिंदा’, ‘क्रांतिवीर’, ‘प्रहार’, ‘तिरंगा’, ‘खामोशी : द म्युजिकल’, ‘वेलकम’ आ ‘नटसम्राट’ जइसन फिलिम में उनकर प्रभावशाली अभिनय के दर्शक लोग खूब पसंद कइल।
‘परिंदा’ खातिर उनकरा के सर्वश्रेष्ठ सहायक अभिनेता के राष्ट्रीय फिल्म पुरस्कार मिलल रहे। ‘क्रांतिवीर’ खातिर सर्वश्रेष्ठ अभिनेता आ ‘अग्निसाक्षी’ खातिर सर्वश्रेष्ठ सहायक अभिनेता के राष्ट्रीय फिल्म पुरस्कार जीत के ऊ तीन गो राष्ट्रीय फिल्म पुरस्कार अपना नाम कइले रहलें।
भारतीय सिनेमा में उनकर योगदान के सम्मान करत भारत सरकार साल २०१३ में उनकरा के प्रतिष्ठित पद्मश्री सम्मान से सम्मानित कइले रहे।
नाना पाटेकर के निधन के खबर से भारतीय फिल्म जगत में शोक के लहर दौड़ गइल बा। उनकर सहकर्मी, कलाकार आ अलग-अलग क्षेत्र के लोग सोशल मीडिया के माध्यम से श्रद्धांजलि दे रहल बा।
पर्दा पर दमदार अभिनय, प्रभावशाली संवाद प्रस्तुति आ अलग अंदाज के चलते दर्शक लोग के बीच खास पहचान बनवले नाना पाटेकर के निधन के भारतीय सिनेमा जगत एगो अनुभवी आ प्रभावशाली कलाकार के विदाई के रूप में देख रहल बा।