वीरगञ्ज। राष्ट्रीय स्वतन्त्र पार्टी (रास्वपा) द्वारा चलावल जा रहल ‘हम आ रहल बानी’ कार्यक्रम पर्सा जिला के पटेरवा सुगौली गाँवपालिका–४, सुगौली में भव्य रूप से सम्पन्न भइल।
गाँवपालिका सभापति कविता चौधरी के अध्यक्षता में आयोजित एह कार्यक्रम में रास्वपा के केंद्रीय प्रतिनिधि माननीय प्रमोद महतो आ माननीय उमरकान्त चौधरी मुख्य अतिथि के रूप में शामिल रहलें।
कार्यक्रम में पार्टी के जिला प्रतिनिधि, क्षेत्रीय सभापति, पालिका समिति आ वार्ड समिति के पदाधिकारी, स्थानीय नेता–कार्यकर्ता आ ‘घंटी मित्र’ लोग के उल्लेखनीय भागीदारी रहल। कार्यक्रम में शामिल लोग पार्टी के संगठन विस्तार, स्थानीय स्तर पर जनसम्पर्क मजबूत बनावे आ जनता के समस्या के प्राथमिकता के साथ उठावे के विषय पर आपन रुचि देखवलें।
रास्वपा के ओर से चलावल जा रहल ‘हम आ रहल बानी’ कार्यक्रम के स्थानीय स्तर पर पार्टी के उपस्थिति मजबूत करे, नेता–कार्यकर्ता आ समर्थक लोग के बीच आपसी समन्वय बढ़ावे आ नागरिकन से सीधा संवाद स्थापित करे के उद्देश्य से जोड़ के देखल जा रहल बा।
कार्यक्रम में स्थानीय नेता–कार्यकर्ता आ समर्थक लोग के भागीदारी से पटेरवा सुगौली क्षेत्र में पार्टी के गतिविधियन के प्रति रुचि बढ़े के संकेत मिलल बा, अइसन आयोजक पक्ष के कहनाम बा। एह तरह के कार्यक्रम के माध्यम से पार्टी के संगठन के अउरी सक्रिय बनावत स्थानीय जनता के नजदीक रह के काम करे के प्रयास कइल जा रहल बा।
कार्यक्रम के बारे में जानकारी देत युवा नेता राजकुमार साह बतवलें कि जिला, क्षेत्र, पालिका आ वार्ड स्तर के प्रतिनिधि, स्थानीय नेता–कार्यकर्ता आ ‘घंटी मित्र’ लोग के सहभागिता से ई कार्यक्रम भव्य रूप से सम्पन्न भइल।