वीरगंज । विश्व निवेशक सप्ताह २०२६ के अवसर पर निवेशक लोग के सुरक्षित निवेश, डिजिटल माध्यम से होखे वाला ठगी आ वित्तीय अपराध से बचावे के उद्देश्य से वीरगंज में पैनल चर्चा आ विद्यार्थी लोग के नाटक प्रस्तुति कार्यक्रम आयोजित भइल।
मर्चेन्ट बैंकर्स एसोसिएशन ऑफ नेपाल (एमबीएएन) के आयोजन में वीरगंज महानगरपालिका–आदर्शनगर स्थित सरोवर पोर्टिको में ई कार्यक्रम सम्पन्न भइल। ‘निवेशकन के प्रतिरोध क्षमता, डिजिटल छल-कपट आ ठगी से सतर्कता’ मूल विषय आ ‘अपना भविष्य में निवेश करीं, आजे ओकर सुरक्षा करीं’ नारा के साथ आयोजित कार्यक्रम में सुरक्षित, जागरूक आ जिम्मेदार निवेश के महत्व पर चर्चा कइल गइल।
कार्यक्रम के मुख्य अतिथि मधेश विश्वविद्यालय के उपकुलपति प्रो. डॉ. दीपकबहादुर शाक्य रहलें। एह मौका पर वीरगंज उद्योग वाणिज्य संघ, पर्सा के वरिष्ठ उपाध्यक्ष माधवराज पाल, वीरगंज पब्लिक कॉलेज के सहप्रधानाध्यापक डॉ. अरविन्द श्रेष्ठ आ नेपाल युवा उद्यमी मंच (एनवाईईएफ), वीरगंज के अध्यक्ष चन्दन सिंह समेत कई गो गणमान्य लोग के विशेष उपस्थिति रहल।
कार्यक्रम के शुरुआत कॉलेज के विद्यार्थी लोग के स्वागत नृत्य से भइल। एकरा बाद विद्यार्थी लोग सुरक्षित निवेश, वित्तीय जागरूकता आ डिजिटल माध्यम से हो सके वाला ठगी से बचे के उपाय पर आधारित संदेशमूलक नाटक प्रस्तुत कइलें। नाटक के माध्यम से निवेश करे से पहिले जरूरी जानकारी जुटावे, जोखिम के समझे आ डिजिटल ठगी से सतर्क रहे के संदेश दिहल गइल।
कार्यक्रम के तहत आयोजित पैनल चर्चा में नेपाल धितोपत्र बोर्ड (सेबोन), मर्चेन्ट बैंकर्स एसोसिएशन ऑफ नेपाल, वीरगंज उद्योग वाणिज्य संघ आ नेपाल युवा उद्यमी मंच के प्रतिनिधि लोग भाग लिहलें।
चर्चा में सेबोन के निर्देशक रेवत श्रेष्ठ, एमबीएएन के कार्यकारी सदस्य आ एनआईएमबी एस क्यापिटल के नायब प्रमुख कार्यकारी अधिकृत सचिन्द्र ढुङ्गाना, वीरगंज उद्योग वाणिज्य संघ के वरिष्ठ उपाध्यक्ष माधवराज पाल आ एनवाईईएफ वीरगंज के अध्यक्ष चन्दन सिंह पैनल सदस्य के रूप में शामिल रहलें। चर्चा के संचालन वीरगंज पब्लिक कॉलेज के सहप्रधानाध्यापक डॉ. अरविन्द श्रेष्ठ कइलें।
एह कार्यक्रम में एमबीएएन के कार्यकारी सदस्य आ नेपाल लाइफ क्यापिटल के प्रमुख कार्यकारी अधिकृत मनिष घिमिरे आ सेबोन के बसन्त लामिछाने के भी उपस्थिति रहल। विजयलाल श्रेष्ठ समेत अउरी कई गो लोग कार्यक्रम में शामिल भइलें।
पैनल चर्चा के दौरान निवेश से जुड़ल फैसला लेत समय भरोसेमंद जानकारी आ आधिकारिक स्रोत के इस्तेमाल करे, डिजिटल माध्यम से आवे वाला संदिग्ध प्रस्ताव से सावधान रहे आ निवेश करे से पहिले संबंधित संस्था के वैधानिकता आ जोखिम के बारे में जानकारी लेवे पर जोर दिहल गइल।
विश्व निवेशक सप्ताह के अवसर पर आयोजित एह कार्यक्रम से खासकर विद्यार्थी, युवा उद्यमी आ आम जनता के बीच वित्तीय साक्षरता बढ़ावे आ सुरक्षित निवेश के संस्कार विकसित करे में मदद मिले के उम्मीद जतावल गइल।
कार्यक्रम के समापन वीरगंज पब्लिक कॉलेज के प्रोफेसर बासु कर्ण के सहजीकरण में भइल।