काठमांडू। इजरायल आ संयुक्त राज्य अमेरिका मिलके इरान पर बड़ हमला शुरू कइले बाड़ें। इजरायल इरान के राष्ट्रपति भवन आ गुप्तचर एजेंसी के मुख्यालय के निशाना बनवले बा।
रिपोर्ट के मुताबिक, इरान के कई महत्वपूर्ण सरकारी भवन पर हमला भइल बा। ई भी खबर बा कि इरान के सर्वोच्च नेता अली खामेनी अभी तेहरान में नइखन, उनकर सुरक्षित जगह पर शिफ्ट क दिहल गइल बा।
इजरायल इरान पर कई मिसाइल दगले बा। हमला के बाद राजधानी तेहरान के कई इलाका से धुआँ उठत देखल गइल बा । इजरायल एह सैन्य अभियान के नाम “शीलड ऑफ जुडा” रखले बा।
अमेरिका कहलस कि इरान में अबहियों उनकर हमला जारी बा। रिपोर्ट में ई भी बतावल गइल बा कि इरान के शहर कोम में भी हमला भइल बा।
एह बीच इजरायल अपना शहरन में हाई अलर्ट घोषित क दिहले बा। नागरिकन से घर में रहे के अपील कइल गइल बा। स्कूल बंद क दिहल गइल बा आ देश भर में सायरन बजावल जा रहल बा।
इरान पर हमला के बाद इराक के भी सतर्क क दिहल गइल बा आ ओकर हवाई क्षेत्र अस्थायी रूप से बंद क दिहल गइल बा।