काठमांडू। इजरायल नेपाल में प्रतिनिधिसभा निर्वाचन सफलतापूर्वक भइल पर नेपाल सरकार आ नेपाली जनता के बधाई दिहले बा।
नेपाल खातिर इजरायली राजदूत श्मुलिक एरी बास आज तिजहरिया ‘नयाँ पश्चिम एसिया मे नव प्रभात’ विषय पर पत्रकार सम्मेलन में कहलन कि इजरायल नेपाल संग आपसी मित्रता आ सहयोग अउरी मजबूत बनावे के इच्छा राखेला। ऊ सम्पन्न निर्वाचन के लोकतन्त्र के मजबूती खातिर महत्वपूर्ण कदम बतवलें।
राजदूत बास के अनुसार, इजरायल पश्चिम एसिया मे शान्ति चाहेला आ पूरा क्षेत्र में शान्ति आ प्रगति खातिर अपना पडोसी देश सभ संगे वार्ता करे के तैयार बा। ऊ कहलन कि हिज्बोल्लाह आ हमास जइसन कट्टरपन्थी समूह बार-बार हमला करत रहेलें, जेकरा के इरान वित्तीय आ अन्य सहायता देत बा।
इजरायल के कहना बा कि अतिवादी समूह के कारण ओकर अस्तित्व पर संकट आइल बा, आ ई आत्मरक्षा खातिर कार्रवाई करत बा। जारी हवाई हमला में इरानी नागरिक पर निशाना ना बनावल गइल बा।
ऊ आगे कहलन, “संयुक्त राज्य अमेरिका आ इजरायल के हवाई हमला इरान के आणविक खतरा निष्प्रभावी करे खातिर बा। ई सिरिफ पश्चिम एसिया ना, बल्कि विश्वव्यापी सुरक्षा से जुड़ल मुद्दा ह।” साभार: रासस
प्रतिनिधिसभा निर्वाचन सफल भइल पर इजरायल से बधाई
