पूर्वी लेबनान में इजरायली हवाई हमला के श्रृंखला में Hezbollah के तीन कमांडरन के मौत हो गइल बा, जबकि कई लोग घायल भइले बाड़े।
लेबनानी सुरक्षा स्रोत के अनुसार एह हमला में कुल ११ लोग के मौत भइल बा आ करीब ३५ लोग घायल भइले बाड़े। पहिलका जानकारी में आठ जने घायल बतावल गइल रहे, बाद में संख्या बढ़ल बतावल गइल।
National News Agency (एनएनए) के रिपोर्ट मुताबिक पूर्वी लेबनान के रियाक इलाका में एगो भवन पर भइल हवाई हमला में १० से अधिक लोगन के मौत आ ३० से अधिक लोग घायल हो गइलें।
चीन के समाचार एजेंसी Xinhua News Agency लेबनानी नागरिक सुरक्षा स्रोत के हवाला देते बतवले बा कि मृतक संख्या ११ हो चुकल बा आ ३५ लोग घायल बा। अभी मलबा में फँसल लोगन के खोज जारी बा।
सुरक्षा स्रोत के अनुसार मरे वाला तीन कमांडर में हुसेन मोहम्मद याघी, अली जाइद अल–मुसावी आ मोहम्मद इब्राहिम अल–मुसावी शामिल बाड़े।
Hezbollah एगो बयान जारी क के कमांडर हुसेन मोहम्मद याघी के निधन पर शोक जतवले बा आ कहले बा कि ऊ “लेबनान आ ओकरा लोगन के रक्षा करत शहीद भइले।”
सुरक्षा स्रोत के हवाला देते Xinhua News Agency बतवले बा कि इजरायली लड़ाकू विमान पूर्वी लेबनान में हिजबुल्लाह से जुड़ल ठिकानन समेत कुल छह गो हवाई हमला कइले बा।
जानकारी मुताबिक २७ नवम्बर २०२४ से हिजबुल्लाह आ इजरायल के बीच युद्धविराम समझौता लागू बा। एह समझौता के बावजूद, इजरायली सेना द्वारा समय–समय पर लेबनान में हमला कइल जात रहल बा।