काठमांडू । बर्दिया नेशनल पार्क के अंदर अवैध सिकार करे खातिर घुसल सुर्खेत जिला के ६ जना युवक पिछला ९ दिन से रहस्यमय तरीका से लापता हो गइल बाड़ें।
जानकारी के मुताबिक फागुन २३ गते के ऊ लोग घर से निकुञ्ज (नेशनल पार्क) के ओर गइल रहलें। काफी दिन बीत जाए के बादो जब ऊ लोग घर ना लवटलें, त परिवार वाला लोग में चिंता बढ़ गइल। अंत में सोमार के परिजन लोग पुलिस के खबर देहले, तब जा के ई घटना सार्वजनिक भइल।
पुलिस के अनुसार लापता होखे वाला लोग में सुर्खेत के बराहताल गाउँपालिका–१ ज्यामिरे निवासी २५ साल के रेशम समसेली, ४१ साल के रविलाल दमाई, ३४ साल के रामबहादुर घर्ती, ३० साल के सुनिल समसेली आ ३३ साल के टोपबहादुर खत्री शामिल बाड़ें।
एहसे अलावा लेकवेशी नगरपालिका–८ गंगटे घर भइल आ अभी बर्दिया में रहत ४५ साल के दुर्गाबहादुर सिजाली भी ओही लोग के साथ संपर्क से बाहर हो गइल बाड़ें। प्रारंभिक जांच में पता चलल बा कि ऊ लोग आपन गांव से करीब १७ किलोमीटर दक्षिण तरफ पड़त निकुञ्ज के घना जंगल में सिकार खेले के मकसद से गइल रहलें।
लापता युवक में से टोपबहादुर खत्री के भेनाजु आसे महतरा सोमबार के पुलिस के आधिकारिक जानकारी देके खोजी में मदद करे के अपील कइले बाड़ें।
जिला प्रहरी कार्यालय सुर्खेत के अनुसार लापता युवक लोग के खोज तेज कर दिहल गइल बा। निकुञ्ज के कठिन भूगोल आ जंगली जनावर के खतरा के कारण अब तक ऊ लोग के बारे में कोई पक्का जानकारी ना मिल पावल बा।
पुलिस बतवलस कि निकुञ्ज प्रशासन आ सुरक्षा में लागल निकायन के साथ समन्वय करके जंगल इलाका में निगरानी आ खोजी अभियान जारी रखल गइल बा।
बर्दिया नेशनल पार्क में सिकार करे गइल ६ युवक ९ दिन से लापता
