वीरगंज । वीरगंज महानगरपालिका के मेयर राजेशमान सिंह वीरगंज स्थित नेपाल राष्ट्रिय विद्यापीठ माध्यमिक विद्यालय, श्रीपुर के स्थलगत निरीक्षण कइले बानी।
निरीक्षण के दौरान ऊ विद्यालय में नियमित कक्षा संचालन के स्थिति, छात्र-छात्रन के उपस्थिति, दिवा खाजा कार्यक्रम के प्रभाव आ साफ-सफाई व्यवस्था के बारे में जानकारी लिहनी। एही संग-संग ऊ विद्यालय के समग्र शैक्षिक माहौल सुधार पर शिक्षक आ विद्यालय प्रबंधन संग चर्चा कइनी।
मेयर सिंह शैक्षिक गुणस्तर बढ़ावे, विद्यार्थी मैत्री वातावरण बनावे आ सरकारी कार्यक्रम के प्रभावी रूप से लागू करे पर विशेष ध्यान देवे के निर्देश दिहनी। ऊ विद्यालय के भौतिक संरचना आ प्रबंधन पक्ष के मजबूत करे पर भी जोर दिहनी।
सामुदायिक विद्यालयन के स्तर ऊपर उठावे खातिर स्थानीय तह के सक्रिय भूमिका जरूरी बा, ई बतावत ऊ शिक्षक, अभिभावक आ सरोकार वाला सभ के बीच सहयोग के अपरिहार्य बतवनी।
मेयर सिंह शिक्षा क्षेत्र में सुधार खातिर लगातार निरीक्षण के प्राथमिकता देवे के प्रतिबद्धता भी जाहिर कइनी।
वीरगंज में मेयर राजेशमान सिंह द्वारा स्कूल के निरीक्षण
