वीरगंज: पर्सा निर्वाचन क्षेत्र नम्बर २ से राष्ट्रीय स्वतन्त्र पार्टी (रास्वपा) के प्रतिनिधि सभा सदस्य सुशील कुमार कानु घरेलू हिंसा में गंभीर रूप से घायल हरिकला देवी सहनी से भेट कइनी।
बारा के परवानीपुर गाउँपालिका में स्थित एलएस न्युरो अस्पताल में इलाज करा रहल सहनी से बिअफे के दिन मिलके ऊ उनकर स्वास्थ्य के हालचाल लिहनी। एही संगे, पीड़िता पर जघन्य हमला करे वाला उनकर पति विश्वनाथ सहनी के जल्द से जल्द गिरफ्तार करके कड़ा कार्रवाई करे खातिर पुलिस प्रशासन से आग्रह कइनी।
भेट के दौरान सांसद कानु इलाज में कवनो कमी ना होखे के आश्वासन देत पूरा खर्च खुद उठावे के प्रतिबद्धता जतवनी। ऊ बतवनी कि काठमांडू में रहला के बावजूद भी पीड़िता के हालत के बारे में लगातार जानकारी लेत रहल बाड़न।
कानु पर्सा के पुलिस प्रमुख एसपी सुदीप राज पाठक से भी घटना पर चर्चा कइनी आ दोषी के जल्दी गिरफ्तार करे के आग्रह कइनी। ऊ कहलन कि अइसन अमानवीय घटना पर कड़ा कानूनी कार्रवाई जरूरी बा।
महिला हिंसा रोके खातिर नीतिगत सुधार के जरूरत पर जोर देत ऊ संसद में ई मुद्दा उठावे आ पीड़िता खातिर राहत के व्यवस्था करे के मांग सरकार से करे के प्रतिबद्धता जतवनी।
घरेलू हिंसा में घायल महिला से सांसद सुशील कानु के भेट
