पोखरिया अस्पताल में एक साल से एक्स-रे सेवा बंद रहे के बावजूद कर्मचारी लोग 80 हजार जोखिम भत्ता ले लेले

वीरगंज। पर्सा के पोखरिया नगरपालिका में स्थित प्रादेशिक अस्पताल में करीब एक साल से एक्स-रे मशीन आ लैब सेवा बंद रहल, तबहूँ उहां काम करे वाला कुछ कर्मचारी लोग जोखिम भत्ता लेवे के मामला सामने आइल बा।
स्रोत के अनुसार, अस्पताल के एक्स-रे आ लैब में काम करे वाला राज कुशवाहा, राजु मंडल, दीपक चौरसिया आ सेराजुल अंसारी जनही 80 हजार रुपैया के हिसाब से जोखिम भत्ता लेले बाड़न।
अस्पताल में जब एक्स-रे आ लैब सेवा चालूए ना रहे, तब जोखिम भत्ता देवे के कारण स्थानीय स्तर पर आर्थिक अनियमितता आ सार्वजनिक धन के दुरुपयोग के आरोप लाग रहल बा। सरोकार वाला लोग के कहनाम बा कि सेवा बंद रहल हालत में जोखिम भत्ता देना नियम के खिलाफ बा, आ एह मामला के निष्पक्ष जांच होखे के चाहीं।
स्रोत के मुताबिक, कार्यालय प्रमुख आ लेखा शाखा के जिम्मेदार अधिकारी लोग के मिलेमतो से ई भत्ता बाँटल गइल होखे के आशंका बा। लमहर समय से सेवा बंद रहे के बावजूद भत्ता बाँटल गइल, जवन अनियमितता के शक बढ़ावत बा।
स्थानीय बासी आ सरोकार वाला लोग मांग कइले बा कि जोखिम भत्ता देवे के आधार, पैसा पावे वाला कर्मचारी के विवरण आ भुगतान प्रक्रिया सार्वजनिक कइल जाव। साथे घटना के निष्पक्ष जांच क के दोषी लोग पर कानून अनुसार कारवाई करे के भी मांग उठल बा।
एह बीच, एक्स-रे विभाग में काम करे वाला कर्मचारी राजु मंडल ई बात मानले बाड़न कि ऊ लोग जोखिम भत्ता लिहले बा। ऊ बतवले कि एक्स-रे सेवा चैत महीना के आखिरी हफ्ता से बंद भइल बा।
मंडल के अनुसार, एक्स-रे मशीन पूरी तरह खराब ना भइल रहे, बलुक फिल्टर खराब होखे के कारण सेवा प्रभावित भइल। सेवा बंद रहे के समय अवधि के बारे में ऊ अलग दावा कइले बाड़न।