जितपुरसिमरा में तीन बरिस के लइकी के हत्या, १६ बरिस के किशोर गिरफ्तार

वीरगञ्ज । बारा के जितपुरसिमरा उपमहानगरपालिका–१ भक्तिनगर में तीन बरिस के एगो लइकी के हत्या हो गइल बा। शुरुआती जांच में चकलेट के लालच देखाके लइकी के ले जाइल आ जबरदस्ती करला के बाद हत्या कइल गइल होखे के सामने आइल बा। घटना में संलग्न रहल आरोप में पुलिस एगो किशोर समेत दू गो के गिरफ्तार कइले बिया।
पुलिस के मुताबिक, जितपुरसिमरा–१ दसधुरी में रहे वाली मनमती चौधरी के तीन बरिस के बेटी गरिमा चौधरी सावन ३१ गते बिहान करीब ८:३० बजे से लापता रहली। परिवार खोजबीन करत रहे। एह बीच भादो २ गते साँझिया करीब ५:४५ बजे भक्तिनगर में वीरबहादुर रोका के टायल से छावल एकतल्ला घर के खाली कोठरी में लइकी के शव मिलल।
लइकी के शव मिलल के सूचना मिलते ही इलाका प्रहरी कार्यालय सिमरा से प्रहरी नायब उपरीक्षक दिलीप क्षेत्री के कमाण्ड में पुलिस आ सोको (SOCO) टोली घटनास्थल पर पहुँच गइल। जिला प्रहरी कार्यालय बारा से प्रहरी उपरीक्षक नरेन्द्र कुँवर के कमाण्ड में अतिरिक्त अनुसन्धान टोली भी घटनास्थल पर भेजल गइल।
घटना के जांच खातिर नेपाल प्रदेश प्रहरी कार्यालय पर्सा, वीरगञ्ज से तालिम प्राप्त कुकुर समेत के टोली भी परिचालन कइल गइल, पुलिस बतवले बिया।
शुरुआती अनुसन्धान में जितपुरसिमरा–२ में रहे वाला भीमसेन थापा के करीब १६ बरिस के बेटा सुमन थापा चकलेट देके लइकी के बहका-फुसलाके घटनास्थल पर ले गइल होखे के खुलासा भइल बा। ओकरा बाद लइकी के साथ जबरदस्ती करला आ हत्या कइला के आशंका में पुलिस अनुसन्धान आगे बढ़वले बिया।
घटना में संलग्न रहल आरोप में पुलिस सुमन थापा के गिरफ्तार कइले बिया। एही तरह ना.१ ज ७७५८ नम्बर के म्याजिक गाड़ी के धनी जितपुरसिमरा–१ निवासी २४ बरिस के प्रोग्रेस चौधरी के भी पुलिस नियन्त्रण में लेले बा।
पुलिस दुनु जना के नियन्त्रण में लेके घटना के बारे में थप अनुसन्धान करत बा। लइकी के शव परीक्षण आ थप अनुसन्धान के बाद घटना के विस्तृत विवरण सामने आई, पुलिस जनवले बा।